मोठी बातमी! नारायण राणेंकडूनच ‘अधीश’ बंगल्यावर हातोडा
मुंबई | Narayan Rane Bungalow – भाजपचे ज्येष्ठ नेते आणि केंद्रीय मंत्री नारायण राणे (Narayan Rane) यांच्या मुंबईतील ‘अधीश’ बंगल्यावर (Adhish Bungalow) अखेर हातोडा पडला आहे. मुंबई उच्च न्यायालयाच्या (Bombay High Court) आदेशानंतर नारायण राणे यांनी अधीश बंगल्यामधील अनधिकृत बांधकाम स्वत:हून हटवायला सुरूवात केली आहे. हे बांधकाम येत्या आठ ते दहा दिवसात हटवले जाईल. तसंच बंगल्यावर जो अनधिकृत भाग होता तो काढून नकाशाप्रमाणे नियमात बांधकाम ठेवलं जाणार आहे.
नारायण राणेंच्या जुहू येथील अधीश बंगल्यातील अनधिकृ बांधकाम पाडण्याचे आदेश मुंबई हायकोर्टानं दिले होते. तसंच हायकोर्टानं राणेंना 10 लाख रूपयांचा दंडही ठोठावला होता. सीआरझेड कायदा आणि एफएसआयचे उल्लंघन केल्याचं हायकोर्टाला आढळलं. दोन आठवड्यात कारवाई करून अहवाल सादर करण्याचे निर्देश हायकोर्टानं मुंबई महापालिकेला दिले होते. मात्र, मुंबई महापालिकेनं कारवाई करण्याअगोदरच नारायण राणे यांनी स्वत:हून बंगल्यातील अनधिकृत बांधकामावर हातोडा चालवण्यास सुरूवात केली आहे.
दरम्यान, माहिती अधिकार कार्यकर्ते संतोष दौंडकर यांनी नारायण राणे यांनी ‘अधीश’ बंगल्यात मोठ्या प्रमाणावर अंतर्गत बदल केल्याची, अतिरिक्त बदल केल्याची तक्रार मुंबई महानगरपालिकेकडे केली होती. या तक्रारीची दखल घेऊन महानगरपालिकेच्या अधिकाऱ्यांनी 21 फेब्रुवारी रोजी अधीश बंगल्याची पाहणी केली. पाहणीदरम्यान अधीश बंगल्यात अंतर्गत फेरबदल करण्यात आल्याचं अधिकाऱ्यांच्या निदर्शनास आलं होतं. त्यानंतर संपूर्ण इमारतीचा आराखडा आणि प्रत्यक्ष बांधकामाची पडताळणी करण्यात आली व बांधाकाम अनधिकृत आहे म्हणून शिक्कामोर्तब झालं.
