“आजपासून तुझं नाव गांजा काळे”; काळेंच्या ‘त्या’ विधानावर बिचुकलेंचं प्रत्युत्तर; राज ठाकरेंचाही केला उल्लेख!
सातारा : (Abhijeet Buchukale On Gajanan Kale) एका कार्यक्रमात बोलताना मनसे नेते गजानन काळे यांनी संजय राऊतांवर टीका करताना अभिनेते अभिजीत बिचुकले यांच्या नावाचा उल्लेख केला होता. सेक्रेड गेम्समध्ये जसं नवाजुद्दीन सिद्धीकीला जसं वाटतं की ‘आपणच देव आहोत’, तसंच संजय राऊतांना वाटतं. इतका आत्मविश्वास महाराष्ट्रात दोनच व्यक्तीकडे आहे. एक म्हणजे संजय राऊत आणि दुसरे म्हणजे अभिजीत बिचुकले, असे ते म्हणाले होते. दरम्यान, यावरून अभिजीत बिचुकले यांनी गजानन काळे यांना प्रत्युत्तर दिलं आहे.
“राज ठाकरे आमचे बंधू आहेत. मला त्यांना सांगायचं आहे, की त्यांचा जो पदाधिकारी आहे, गजानन काळे त्याला आज मी गांजा काळे असं नाव देतो. संपूर्ण महाराष्ट्राने हे लक्षात ठेवावं. संजय राऊतांचे आणि तुमचं काय वैर असेल ते असेल. पण तो मला गांजा ओढतो बोलला. गजानन काळेच्या ७०० पिढ्यांना अभिजीत बिचुकलेची औकात माहिती आहे का? अभिजीत बिचुकलेची जात, धर्म महाराष्ट्राच्या नावात आहे”, असं प्रत्युत्तर अभिजीत बिचुकले यांनी गजानन काळे यांना दिलं. पुढे बोलताना राज ठाकरे माझे भाऊ आहेत, असेही ते म्हणाले.
काही दिवसांपूर्वी मनसेच्या एका कार्यक्रमात बोलताना मनसे नेते गजानन काळे यांनी संजय राऊतांवर टीका करताना अभिनेते अभिजीत बिचुकले यांच्या नावाचा उल्लेख केला होता. “संजय राऊत सकाळी सकाळी कडक गांजा मारून असतात. सेक्रेड गेम्समधला नवाजुद्दीन सिद्धीकीला जसं वाटतं की आपणच देव आहोत, तसंच संजय राऊतांना वाटतं. इतका आत्मविश्वास महाराष्ट्रात दोनच व्यक्तीकडे आहे. एक म्हणजे संजय राऊत आणि दुसरे म्हणजे अभिजीत बिचुकले”, असे ते म्हणाले होते.
