निवृत्तीच्या निर्णयावर शरद पवार फेरविचार करणार; अजित पवारांनी दिली माहिती, म्हणाले…
मुंबई | Sharad Pawar – शरद पवारांनी (Sharad Pawar) आज त्यांच्या निवृत्तीची घोषणा केली. या घोषणेनंतर शरद पवारांनी त्यांचा निर्णय मागे घेण्यासाठी राष्ट्रवादी काँग्रेसचे कार्यकर्ते यशवंतराव चव्हाण सेंटरच्या बाहेर उपोषणाला बसले होते. जोपर्यंत शरद पवार त्यांचा निर्णय मागे घेत नाहीत तोपर्यंत आम्ही येथून जाणार नसल्याचं उपोषणकर्त्यांनी म्हटलं आहे. अशातच आता शरद पवार हे त्यांच्या अध्यक्षपदाच्या राजीनाम्यावर फेरविचार करणार असल्याची माहिती अजित पवारांनी (Ajit Pawar) दिली आहे.
अजित पवार म्हणाले की, पवार साहेब आज असा निर्णय घेतील असं कुणालाही वाटलं नव्हतं. कार्यकर्ते शांत होत नव्हते त्यामुळे पवार साहेबांनी आवाहनही केलं होतं. पण तरीही कार्यकर्ते शांत बसले नाहीत. त्यानंतर आम्ही सर्व नेत्यांनी मिळून साहेबांशी चर्चा केली.
पवार साहेबांशी चर्चा करताना ते म्हणाले सर्वांना माझा निरोप द्या. तुमच्या आग्रहाखातर मला विचार करायला दोन ते तीन दिवस द्या. पण जर कार्यकर्त्यांनी आंदोलन सुरूच ठेवलं तर ते आपला निर्णय बदलणार नाहीत, असंही शरद पवारांनी सांगितल्याचं अजित पवार म्हणाले.
