“ईडीचे समन्स आल्यापासून मला…”, चौकशीला हजर राहण्याआधी जयंत पाटलांचं ट्विट

मुंबई | Jayant Patil – राष्ट्रवादी काँग्रेसचे प्रदेशाध्यक्ष जयंत पाटील (Jayant Patil) यांना आज (22 मे) ईडी चौकशीसाठी बोलवण्यात आलं आहे. आयएल अॅण्ड एफएस कोट्यावधी रूपयांचा गैरव्यवहार आणि संशयास्पद कर्जाचे वाटप केल्याप्रकरणी जयंत पाटलांची चौकशी केली जाणार आहे. तसंच सकाळी 11 वाजता ते ईडी कार्यालयात हजर झाले आहेत. या दरम्यान, ईडी चौकशीसाठी हजर राहण्याआधी जयंत पाटलांनी ट्विट केलं होतं. त्यांचं हे ट्विट सध्या चांगलंच चर्चेत आहे.

जयंत पाटील यांनी ट्विट करत म्हटलं आहे की, “आज सकाळी 11 वाजता मी ईडी कार्यालयात उपस्थित राहणार आहे. ईडीचे समन्स आल्यापासून मला राज्यभरातून मला माझ्या पक्षातील व इतर मित्र पक्षातील पदाधिकाऱ्यांचे फोन येत आहेत. तसंच राज्यभरातून आज लोक ईडी कार्यालयाबाहेर येत असल्याचं मला समजलं.”

“माझी सर्व पदाधिकारी व कार्यकर्ते यांना विनंती आहे की कोणीही मुंबईला येऊ नये. मी या चौकशीकामी ईडीला पूर्णपणे सहकार्य करणार असून आपण सर्वांनी माझ्याप्रती दाखवलेल्या प्रेमाबद्दल मी आपला आभारी आहे”, असंही जयंत पाटील म्हणाले.