एकनाथा अजब तुझे सरकार! कृषिमंत्र्यांच्या जिल्ह्यात, पालकमंत्र्याच्या गावात बियाणांमध्ये शेतकऱ्यांची फसवणूक
छत्रपती संभाजीनगर : (ABP Majha Sting Operation) राज्यात बोगस बियाणे आणि वाढीव दराने त्याची विक्री करणाऱ्या लोकांविरोधात धाडसत्र सुरू आहे. आता खुद्द कृषी मंत्री असलेल्या (Abdul Sattar) अब्दुल सत्तारांच्या छत्रपती संभाजीनगर जिल्ह्यात (Chhatrapati Sambhaji Nagar District) आणि जिल्ह्याचे पालकमंत्री असलेल्या संदिपान भुमरे (Sandipan Bhumre) यांच्या गावात शेतकऱ्यांची फसवणूक सुरु आहे. जिल्ह्यातील अनेक भागांत साडेआठशे रुपायाची कापसाची बॅग साडेबाराशेपासून तर 2000 ते 2500 रुपयांपर्यंत विकली जात आहे. हा सर्व प्रकार ‘एबीपी माझा’ने केलेल्या स्टिंग ऑपरेशनमधून समोर आला आहे.
यावेळी ‘एबीपी माझा’च्या टीम टीमकडून सांगण्यात आलं की, आम्ही संकेत नावाच्या कापसाच्या बॅगेची मागणी केली. यावेळी त्याची किंमत तब्बल 2300 रुपये सांगण्यात आली. विशेष म्हणजे, आज पैसे देऊन बुक केल्यावर उद्या बियाणे मिळतील, असेही सांगण्यात आले. या बियाणेचे पक्के बिल देखील मिळणार नसल्याचे स्पष्ट सांगण्यात आले.
तर आणखी एका दुकानात असलेल्या तरुणाने आम्हाला कब्बडी नावाच्या बियाणेबाबत विचारले असता, त्याने 1200 रुपये किंमत सांगितली. विशेष म्हणजे, त्याच्यासोबत आणखी दुसरे बियाणे घेणं देखील बंधनकारक असल्याचे ‘एबीपी माझा’च्या टीमने सांगितलं.एकीकडे 853 रुपयांचे कापसाचे बियाणे 2300 रुपयांना विकले जात आहे. धक्कादायक म्हणजे, एवढ्या महागड्या किंमतीत बियाणे घेऊन देखील शेतकऱ्यांना बियाणाच्या लिंकिंगचा सामना करावा लागत आहे.
इतर बियाणे घेतल्यावरच कब्बडी, संकेत नावाचे वान तुम्हाला विकत मिळते. त्यामुळे शेतकऱ्यांची होणारी फसवणूक कधी थांबणार असा प्रश्न उपस्थित होत आहे. सोबतच कृषी मंत्रीच्या जिल्ह्यात आणि पालकमंत्र्यांच्या गावात अशी परिस्थिती असेल तर राज्यात काय चित्र असेल असाही सवाल विचारला जात आहे.
