अंधेरीच्या पोटनिवडणुकीत 66.63 टक्के मतदान; ६ नोव्हेंबरला लागणाऱ्या निकालाकडे सर्वांचे लक्ष!
मुंबई : (Andheri by-election 66.63 percent voting) आज सकाळी ७ वाजल्यापासूनच मतदानाला सुरूवात झाली होती. अंधेरी पूर्वेला सर्व २५६ मतदान केंद्रांवर शांततेत मतदान पार पडलं. या निवडणुकीच्या निमित्ताने मोठ्या प्रमाणात मतदान होईल अशी अपेक्षा केली जात होती. पण भाजपनं निवडणुकीतून माघार घेतल्यानं या निवडणुकीचं महत्व कमी झालं होतं. अनेक मतदारांनी निवडणुकीकडे पाठ फिरवल्याचा परिणाम हा मतदानाच्या आकडेवारीवरही दिसून आला.
महाराष्ट्र विधानसभेच्या अंधेरी पूर्व पोटनिवडणुकीत ६६.६३ टक्के मतदान झालं. सुरुवातीला मतदारांनी निरुत्साह दाखवल्यानं मतदानाची टक्केवारी खूपच कमी होती. संध्याकाळी पाच वाजेपर्यंत २८.७७ टक्केच मतदान झालं होतं पण त्यानंतर मतदारांनी मतदान केंद्रांवर गर्दी केल्यानं मतदानाची वेळ संपेपर्यंत हे मतदान ६६.६३ टक्क्यांवर पोहोचलं.
अनेक मतदारांनी आयती सुट्टी लक्षात घेऊन मतदानापेक्षा सुट्टीचा आनंद घेण्यात समाधान मानल्याचे चित्र होते. दुसरीकडे मतदानाच्या निमित्ताने नोटाचा पर्याय वापरण्यात येणार असल्याची तक्रार ही ऋतुजा लटके यांच्याकडून करण्यात आली होती. परंतू नोटाचाही फारसा परिणाम टक्केवारीवर दिसून आला नाही. परंतू नेमकी नोटाची आकडेवारी ही येत्या दिवसात स्पष्ट होईल. आज मतदान झाल्यानंतर संपूर्ण मतांची मोजणी येत्या ६ नोव्हेंबर रोजी पार पडणार आहे.
