“अशोक चव्हाणांची क्लिपच आम्ही जाहीर केली तर…”, आशिष शेलारांचा इशारा!
मुंबई | Ashish Shelar On Ashok Chavan – राज्यात 2019मध्ये अस्तिवात आलेल्या महाविकास आघाडी सरकारवर अनैसर्गिक युती असल्याची टीका भाजपकडून करण्यात आली. तसंच शिवसेनेनं काँग्रेस-राष्ट्रवादीसोबत आघाडी केलीच कशी? असा सवालही उपस्थित करण्यात आला. यासंदर्भात काँग्रेस नेते अशोक चव्हाण (Ashok Chavan) यांनी काल (28 सप्टेंबर) नांदेडमध्ये बोलताना खळबळजनक खुलासा केला आहे. त्यामुळे राजकीय वर्तुळात चर्चांना उधाण आलं आहे. याबाबत आता भाजप आमदार आशिष शेलार (Ashish Shelar) यांनी अशोक चव्हाणांना जाहीर इशारा दिला आहे.
अशोक चव्हाण यांनी बुधवारी नांदेडमध्ये बोलताना फडणवीस सरकारच्या काळात शिवसेनेकडून काँग्रेस-राष्ट्रवादीकडे आघाडीचा प्रस्ताव आल्याचा दावा केला आहे. “भाजपसोबत राहायचे नाही, ही शिवसेनेची भूमिका फडणवीस सरकारच्या काळातच झाली होती. राष्ट्रवादी काँग्रेस, काँग्रेस आणि शिवसेना यांनी मिळून सरकार स्थापन करावं असा प्रस्ताव घेऊन शिवसेनेच्या वरीष्ठ नेत्यांचं शिष्टमंडळ आलं होतं. त्यात राज्याचे विद्यमान मुख्यमंत्री आणि शिवसेनेचे तत्कालीन वरीष्ठ नेते एकनाथ शिंदे (Eknath Shinde) यांचाही समावेश होता. या सर्वांनी माझ्या मुंबई कार्यालयात माझी भेट घेतली होती”, असं अशोक चव्हाण म्हणाले आहेत.
“असं सरकार स्थापन करायचं असेल, तर तुम्ही आधी शरद पवारांशी (Sharad Pawar) चर्चा करा असं मी त्यांना सांगितलं होतं. पण त्यानंतर ते शरद पवारांना भेटले किंवा नाही याबाबत मला काहीही माहिती नाही”, असं देखील अशोक चव्हाण म्हणाले.
याच दरम्यान, अशोक चव्हाणांनी केलेल्या दाव्यानंतर आशिष शेलारांनी त्यांना गंभीर इशारा दिला आहे. “अशोक चव्हाणांची क्लिपच आम्ही जाहीर केली, तर त्यांची अडचण होईल. आमचे मित्र आहेत ते. त्यांची अडचण करण्याची आमची इच्छा नाही. काही राजकीय संदेश, प्रथा, परंपरा असतात. त्या प्रथा परंपरांचा आम्ही भंग करणार नाही. त्यांच्या वैयक्तिक आयुष्यावर टीका-टिप्पणी करणार नाही. त्यांच्या राजकीय कृतीवर आम्ही नक्कीच बोलू शकतो”, असं आशिष शेलार यांनी म्हटलं आहे.
