भारतीय क्रिकेट संघाच्या जर्सीमध्ये अचानक मोठा बदल, काय आहे कारण वाचा सविस्तर
नवी दिल्ली : (BCCI New Jersey Sponsor IND vs SL Serial 2023) मंगळवार दि. 03 जानेवारी रोजी भारत विरुद्ध श्रीलंका यांच्यात 3 टी-20 मालिकेतील पहिला सामना मुंबईच्या वानखेडे मैदानावर खेळला जाणार आहे. हार्दिक पांड्याच्या नेतृत्वाखालील युवा संघ आपली टी 20 मोहीम सुरू करणार आहे. या सामन्याच्या आधीच मोठी बातमी समोर आली आहे. संघातील काही खेळाडूंनी श्रीलंकेविरूद्धच्या मालिकेसाठीच्या नव्या जर्सीसह सोशल मीडियावर फोटो शेअर केले.
बीसीसीआयचे जर्सी प्रायोजक एमपीएलने अचानकपणे बीसीसीआयसोबतचा आपला करार संपवत राईट्स केवाल किरण क्लोथिंग लिमिटेंड (Brand Killer) कडे हस्तांतरित केले. बीसीसीआयच्या अॅपेक्स काऊन्सिल मिटिंगमध्ये मार्चपर्यंत कोणत्याही प्रायोजकाला आपले राईट्स हस्तांतरित करता येणार नाही असा निर्णय झाला होता. मात्र आता भारतीय संघाच्या जर्सीवर अचानकपणे किलरचा लोगो झळकल्यामुळे एमपीएलने आपला करार त्वरित संपवल्याचे स्पष्ट झाले.
गेल्या सहा महिन्यात बीसीसीआयने प्रायोजक असलेल्या तीन बड्या कंपन्या गमावल्या आहेत. पेटीयमकडे बीसीसीआयचे स्थानिक क्रिकेट हक्क होते. त्यांनी ते मास्टरकार्डकडे हस्तांतरित करण्यात आले. त्यानंतर बायजूसने देखील बीसीसीआयला करार संपण्यापूर्वीच त्यातून बाहेर पडणार असल्याचे कळवले. आता एमपीएलने ऐनवेळी माघार घेत बीसीसीआयला धक्का दिला.
