महापालिका कर्मचाऱ्यांना मिळणार बंपर दिवाळी बोनस; मुख्यमंत्री एकनाथ शिंदे यांची मोठी घोषणा
विधानसभा निवडणुकीच्या पार्श्वभूमीवर मुख्यमंत्री एकनाथ शिंदे यांचा निर्णयांचा धडका लावला आहे. ठाणे महापालिका कर्मचाऱ्यांना २४००० रुपयांचे सानुग्रह अनुदान मिळणार आहे. मुख्यमंत्री एकनाथ शिंदे यांनी ही घोषणा केली आहे. यामुळे कर्मचाऱ्यांमध्ये आनंदाचे वातावरण आहे.
ठाणे महापालिकेच्या कर्मचाऱ्यांना यंदा दिवाळी सणाकरिता २४००० रुपये एवढे सानुग्रह अनुदान देण्यात येणार आहे. मुख्यमंत्री एकनाथ शिंदे यांनी शुक्रवारी आनंद योग कुटिर येथे ही घोषणा केली. ठाणे महानगरपालिकेने सन २०२२-२३ ठी २१ हजार ५०० रुपये इतके सानुग्रह अनुदान दिले होते. त्यात २५०० रूपयांची वाढ करून २४००० देण्याचे आदेश मुख्यमंत्री शिंदे यांनी दिले.
पुणे महापालिका कर्मचाऱ्यांना २३ हजार रुपये सानुग्रह अनुदान
पुणे महापालिकेच्या १८ हजार कर्मचारी आणि अधिका-यांना दिवाळी बोनस मिळणार आहे. ८.३३ % बोनस तसेच २३ हजार रुपये सानुग्रह अनुदान देण्यात येणार आहे. कर्मचारी आणि अधिका-यांच्या खात्यात दिवाळीपूर्वी ही रक्कम जमा होणार आहे. महापालिकेच्या वित्त आणि लेखा विभागाने त्याबाबतचं परिपत्रक काढलं आहे.
नाशिक मनपाच्या कर्मचा-यांना २० हजार बोनस जाहीर
नाशिक मनपाच्या कर्मचा-यांसाठी आनंदाची बातमी आहे. दिवाळीच्या पार्श्वभूमीवर मनपाच्या साडेचार हजार कर्मचाऱ्यांना २० हजार बोनस जाहीर झाला आहे. तसेच मानधनावर असलेल्या विविध विभागात काम करणाऱ्या ५५० कर्मचाऱ्यांना १० हजार दिवाळी बोनस जाहीर झाला आहे. कर्मचाऱ्यांना दिवाळी बोनस जाहीर झाल्यानं पालिकेच्या तिजोरीवर ९ कोटी ५५ लाखांचा बोजा पडणार आहे. ठाकरे पक्षाच्या संघटनेने मागणी केल्यानंतर, महापालिका कर्मचा-यांना दिवाळीनिमित्त अनुदान जाहीर केलंय..
रेल्वे कर्मचा-यांना ७८ दिवसांचा पगार बोनस म्हणून मिळणार आहे. रेल्वे कर्मचा-यांच्या उत्तम कामगिरीची दखल घेत केंद्रीय मंत्रिमंडळाने २ हजार २८ कोटी रुपयांचा बोनस मंजुर केला आहे. एकूण ११ लाख ७२ हजार २४० रेल्वे कर्मचा-यांना बोनस मिळणार आहे.
