सिनेसृष्टीला मोठा धक्का; प्रसिद्ध कला दिग्दर्शक नितीन देसाई यांची आत्महत्या
मुंबई | Nitin Desai Suicide – सिनेसृष्टीला मोठा धक्का बसला आहे. प्रसिद्ध कला दिग्दर्शक नितीन देसाई (Nitin Desai) यांनी आत्महत्या केली आहे. त्यामुळे सगळीकडे एकच खळबळ उडाली आहे. नितीन देसाई यांनी कर्जतमधील एनडी स्टुडीओमध्ये गळफास घेत आयुष्य संपवलं. ते 58 वर्षांचे होते. त्यांच्या आत्महत्येनं मराठी आणि हिंदी सिनेसृष्टी हादरली आहे.
नितीन देसाई यांचं एनडी स्टुडिओ हे दुसर घर होतं. ते आत्महत्या करण्याच्या दोन दिवसांपूर्वी त्या स्टुडीओमध्येच होते. तसंच कालपर्यंत त्यांनी त्यांच्या टीमला प्रोजक्टबद्दल माहिती देखील दिली होती. पण आज सकाळी ते फोन उचलत नव्हते त्यामुळे कर्मचाऱ्यांनी स्टुडिओच्या अधिकांऱ्यांना याबाबत माहिती दिली. त्यांनतर अधिकाऱ्यांनी दरवाजा तोडला तर नितीन देसाई यांनी आत्महत्या केल्याचं समजलं.
हा घडलेला प्रकार समजताच कर्मचाऱ्यांनी याबाबत पोलिसांना माहिती दिली. त्यामुळे आता पोलिसांनी पुढील तपास करण्यास सुरूवात केली आहे. मात्र, अद्याप नितीन देसाई यांच्या आत्महत्येचं कारण समोर आलेलं नाही.
दरम्यान, नितीन देसाई हे प्रसिद्ध कला दिग्दर्शक असण्यासोबतच ते अभिनेते देखील होते. त्यांनी अनेक सुपरहिट चित्रपटांचे सेट उभारले आहेत. हम दिल दे चुके सनम, लगान, जोधा अकबर, माचिस, देवदास अशा अनेक सुपरहिट ठरलेल्या चित्रपटांचं देसाई यांनी कला दिग्दर्शन केलं होतं. बॉलिवूड सोबतच त्यांचं मराठी सिनेसृष्टीतही मोठं नाव होतं.
