शंपा भूषणच्या वात्सल्याने भारावले रसिक !
सामूहिक कलाविष्काराला उत्स्फूर्त प्रतिसाद
पुणे : रोमार्टिका द्वारा मलाईका स्पाइस, कोगाव येथे भरविलेल्या सामूहिक कलाविष्कार प्रदर्शनातील शंपा भूषण यांच्या वात्सल्य कलाकृतीने रसिकांना भारावून टाकले आहे . केवळ भूषण नव्हे तर या ठिकाणी असलेले प्राणी जीवनातील समूहजीवन, निसर्गऋतू अशा अनेक कलाकृतींना मोठी दाद मिळत आहे. शिबुजी नाथन, नरेंद्र गंगाखेडकर, सोनल, प्रशांत, आशा सिंग, प्रशांत शर्मा यांच्या नवनिर्मित चित्रांना उत्स्फूर्त दाद मिळत आहे. सध्या हे प्रदर्शन पुणेकरांसाठी पर्वणी ठरत आहे.
हे प्रदर्शन ३१ जुलै २०२२ पर्यंत सर्वांना सकाळी ११ ते संध्याकाळी ७ वाजेपर्यंत बघता येईल. ह्या प्रदर्शनाचे उद्घाटन रोटरी क्लबचे अध्यक्ष सॅम्युअल केनेडी ह्यांच्या हस्ते झाले. ह्या प्रदर्शनात शंपा भूषण, शिबूजी नाथन, नरेंद्र गंगाखेडकर, सोनल मंत्री, मैत्री शहा, आशा सिंग गौर आणि प्रशांत शर्मा ह्यांची नवनिर्मित चित्रे ठेवली असून त्यातील वैविध्य, रंगसंगती आणि संकल्पना कौतुकास्पद आहेत.
शिबूजी नाथन ह्यांच्या वैशिष्ट्यपूर्ण चित्रांमध्ये मानसिक तणाव, व्याधी व त्यातून मानवी आयुष्यात प्रकटणार्‍या विविध भावनांचे कलात्मक दर्शन घडते. रंग, षा व विविध आकार ह्यांच्या कलात्मक समन्वयातून चित्रकाराने आपल्या तंत्रशुद्ध शैलीत साकारलेला हा अनोखा आविष्कार त्यातील मूलभूत गुणांमुळे सर्वांना आवडतो. तर नरेंद्र गंगाखेडकर ह्यांच्या चित्रांमधून सृष्टीसौंदर्य व त्याची विविध ऋतूतील आकर्षक रूपे ह्यांचे रम्य दर्शन सर्वांना घडते. तसेच त्यांच्या व्यक्तिचित्रात दर्शविलेले मानवी भावनांचे विविध कंगो सर्वांना मोहित करतात.
सोनल मंत्री हिची चित्रे पूर्ण एक महिनाभर कलादालनात सर्वांना बघता येतील. अमूर्तता व पारंपरिकता ह्यांचा अद्भुत संगम साधून तिने निर्मिलेली ही चित्रे आकर्षक व मनमोहक आहेत. आपल्या वैशिष्ट्यामुळे ती सर्वांना आवडतात.
मैत्री शहा – हिच्या व्यक्तिमत्त्वातून मानवी मनातील विविध भावनांचे उत्कट व भावपूर्ण दर्शन सर्वांना घडते. त्यातील विविधता कौतुकास्पद आहे. आशा सिंग गौर – हिच्या निसर्गचित्रांमधून सर्वांना एक रम्य अनुभूती होते. विविध ऋतूतील निसर्गाची दिसणारी विलोभनीय रूपे आपल्या चित्रांमधून तिने साकारली असून त्यातील वैविध्यामुळे व कलात्मकतेमुळे ही चित्रे सर्वांना आवडतात.
