नागपूर : (IND vs AUS Test Series KL Rahul) गुरूवारपासून सुरू होणाऱ्या बॉर्डर गावसकर ट्रॉफीमध्ये भारताची प्लेईंग 11 ठरवणे ही रोहित शर्मासाठी मोठी डोकेदुखी ठरणार आहे. गोलंदाजीचा प्रश्न तितकासा क्लिष्ट नाही. मात्र फलंदाजीत सलामी जोडी पासून विकेटकिपिंगपर्यंत सगळीकडे रोहितच्या नेतृत्व गुणांचा कस लागणार आहे.
मात्र कसोटीत पंतची रिप्लेसमेंट शोधणे खूप अवघड काम आहे. वनडे प्रमाणे केएल राहुलच कसोटीत देखील विकेट किपिंग करणार का असा प्रश्न पडणे स्वाभाविक आहे. मात्र संघ व्यवस्थापनाने कसोटीत केएल राहुलकडून विकेटकिपिंग करून घेणार नसल्याचे स्पष्ट केले आहे. या परिस्थिती भारतीय संघव्यवस्थापनापुढे दोन पर्याय उरतात. एक इशान किशन आणि दुसरा केएस भरत! इशान किशनने टी 20, वनडे क्रिकेटमध्ये दमदार कामगिरी करत आपली दावेदारी सादर केली आहे. तो देखील पंतसारखा डावखुरा फलंदाज आहे.
मात्र टीम इंडियाच्या संघ व्यवस्थापनाने कसोटीसाठी केएस भरतला पहिली पसंती देण्याचे ठरवले आहे. वृद्धीमान सहाचा पर्याय म्हणून केसी भरत गेल्या दीड वर्षापासून भारतीय कसोटी संघासोबत आहे. मात्र त्याला अजूनपर्यंत कसोटी पदार्पण करण्याची संधी मिळालेली नाही.
याबाबत बीसीसीआयच्या एका वरिष्ठ अधिकाऱ्याने सांगितले की, ‘केएल राहुलला गेल्या वर्षभरात अनेक दुखापती झाल्या आहेत. त्यामुळे त्याला कसोटीत विकेटकिपिंग करायला सांगणे योग्य होणार नाही. कसोटीसाठी तज्ज्ञ विकेटकिपरची गरज आहे. भारतीय संघात भरत आणि इशान असे दोन तज्ज्ञ विकेटकिपर आहेत. कोणाला संधी द्यायची हे संघ व्यवस्थापनावर अवलंबून आहे.’