फायनलचं आमंत्रण न मिळाल्यानंतर कपिल देव म्हणाले, ‘लोग भूल जाते हैं…’
Kapil Dev On World Cup 2023 Final : वर्ल्ड कप 2023 (ICC Cricket World Cup 2023) चा अंतिम सामना नुकताच अहमदाबाद येथील नरेंद्र मोदी स्टेडियम येथे खेळला गेला. ऑस्ट्रेलिया आणि भारत या दोन्ही संघांमध्ये खेळवण्यात आलेल्या या सामन्यात ऑस्ट्रेलियानं यजमानांचा दारुण पराभव केला. यावेळी सामन्यामध्ये अनेक क्षेत्रांतील प्रसिद्ध व्यक्तींची हजेरी पाहायला मिळाली. कला, राजकारण या आणि अशा सर्वच क्षेत्रातील नामवंतांनी हजेरी लावलेली असतानाच सामन्यात एक चेहरा मात्र दिसलाच नाही, तो चेहरा होता देशाला वर्ल्ड कप पहिला मान मिळवून देणाऱ्या महान खेळाडू कपिल देव यांचा.
संपूर्ण जगाच्या नजरा लागून राहिलेल्या या वर्ल्ड कपविषयी देव यांनी दिलेल्या प्रतिक्रियेनं सर्वांच्याच नजरा वळवल्या. आपल्याला अंतिम सामन्यासाठीचं आमंत्रणच मिळालं नव्हतं असं त्यांनी जाहीरपणे सांगितलं. एका माध्यम समुहानं क्रिकेटसंबंधी चर्चेसाठी आमंत्रित केलं असता अंतिम सामन्याच्या आमंत्रणाबाबत ते म्हणाले, ‘तुम्ही मला बोलवलं, मी आलो. त्यांनी (वर्ल्ड कपच्या आयोजकांनी) नाही बोलवलं, मी नाही गेलो. मला वाटत होतं की, 1983 वर्ल्ड कपचा संपूर्ण संघ तिथं नरेंद्र मोदी स्टेडियममध्ये असावा. पण, इतकी सारी कामं सध्या सुरुयेत, इतक्या जबाबदाऱ्या आहेत की अनेकदा लोक विसरूनच जातात.’
तिथं कपिल देव यांनी आपल्याला बोलावणंच आलं नसल्याचं म्हटल्यानं अनेकांच्याच भुवया उंचावल्या. कारण, सामन्याआधी असंही म्हटलं गेलं होतं की, ज्या ज्या खेळाडूंनी वर्ल्ड कप जिंकला आहे त्या खेळाडूंना सामन्यासाठी बोलवण्यात येणार. यामध्ये महेंद्रसिंह धोनी आणि कपिल देव यांची नावं होती खरी, पण देव यांना आमंत्रणच नसल्यामुळं त्यांनी नाराजी व्यक्त केल्याचं पाहायला मिळालं.
