“जा लढ, मी आहे…”, बाळासाहेबांच्या जयंती निमित्त मनसेनं ट्विट केला राज ठाकरेंचा ‘तो’ व्हिडीओ
मुंबई | Balasaheb Thackeray – आज (23 जानेवारी) शिवसेनाप्रमुख बाळासाहेब ठाकरे (Balasaheb Thackeray) यांची जयंती आहे. त्यांच्या जयंती निमित्त राजकीय नेते मंडळींकडून बाळासाहेबांना आदरांजली अर्पण केली जात आहे. तसंच ठाकरे गट (Thackeray Group) आणि शिंदे गटाकडून (Shinde Group) विविध कार्यक्रमांचं आयोजन करण्यात आलं आहे. तर मनसेकडूनही (MNS) बाळासाहेबांच्या (Balasaheb Thackeray) जयंती निमित्त आदरांजली अर्पण करण्यात आली आहे. सोबतच मनसे अध्यक्ष राज ठाकरे (Raj Thackeray) आणि बाळासाहेब ठाकरे यांच्या शेवटच्या भेटीबाबत राज ठाकरे सांगत असतानाचा एक व्हिडीओ मनसेनं ट्विट केला आहे.
“जा लढ, मी आहे… काही मूक संवादांमध्ये प्रचंड अर्थ दडलेले असतात, राज ठाकरे यांचा बाळासाहेब ठाकरे (Balasaheb Thackeray) यांच्याशी अखेरचा ‘राज’कीय संवाद !” असं ट्विट मनसेनं केलं आहे.
मनसेनं ट्वीट केलेल्या व्हीडिओमध्ये राज ठाकरे म्हणतात की, “मला आजही ती गोष्ट आठवते की जेव्हा बाळासाहेबांना कळलं, की हा काही राहत नाही पक्षात आता. माझी शेवटची भेट होती. मी आत्तापर्यंत कधी बोललो नाही तुम्हाला ही गोष्ट. पण निघताना माझ्याबरोबर तेव्हा मनोहर जोशी (Manohar Joshi) होते. मनोहर जोशी रूमच्या बाहेर गेले आणि ते रूमच्या बाहेर गेल्यावर मला बाळासाहेबांनी बोलावलं. माझ्यासमोर हात पसरले आणि मला मिठी मारली आणि म्हणाले आता जा. त्यांना समजलं होतं.”
“जेव्हा मुलाखतकारानं मला विचारलं की भुजबळांचं बंड, नारायण राणेंचं बंड, शिंदेंचं बंडं आणि तुमचं बंड म्हटलं माझं बंड लावू नका त्यात. हे सगळेजण गेले हे एका पक्षात गेले आणि सत्तेत गेले. या तुमच्या राज ठाकरेनं बाळासाहेब ठाकरे यांना भेटून त्यांना सांगून मी बाहेर पडलेलो आहे. त्यामुळे मी दगाफटका करून, गद्दारी करून, पाठीत खंजीर खुपसून असा नाही बाहेर पडलेलो आणि बाहेर पडून दुसऱ्या कुठल्याही पक्षात गेलो नाही. तुमच्या विश्वासावर पक्ष उभा केला.” असंही राज ठाकरे यांनी म्हटलं आहे.
