श्रद्धानं दाखल केलेली तक्रार मागे घेण्यासाठी पोलिसांवर राजकीय दबाव? फडणवीसांनी दिलं स्पष्टीकरण, म्हणाले…

नागपूर | Maharashtra Assembly Winter Session 2022 – श्रद्धा वालकर हत्या प्रकरणानं (Shraddha Walker Murder Case) संपूर्ण देशाला हादरवून सोडलं आहे. तसंच या प्रकरणाचे पडसाद आज (20 डिसेंबर) विधानसभेत उमटले आहेत. श्रद्धा वालकर हत्या प्रकरण हे मानवतेला काळीमा फासणारी घटना असल्याचं वक्तव्य राज्याचे उपमुख्यमंत्री देवेंद्र फडवणीस (Devendra Fadnavis) यांनी केलं आहे. तसंच श्रद्धानं तुळींज-नालासोपारा पोलीस स्थानकात दाखल केलेली तक्रार मागे घेतली. यासाठी पोलिसांवर कोणताही राजकीय दबाव नव्हता, असंही फडणवीसांनी विधानसभेत स्पष्ट केलंय.
सभागृहात श्रद्धा वालकर हत्याकांडाच्या चर्चेची सुरुवात करताना भाजप आमदार अतुल भातखळकर (Atul Bhatkhalkar) यांनी श्रद्धा वालकरनं आफताबविरोधात तक्रार दिली होती. त्यावेळी पोलिसांवर दबाव असल्याच्या चर्चा सुरू होत्या. हा दबाव राजकीय होता का? असा प्रश्न त्यांनी उपस्थित केला. तसंच अमरावती येथे कोल्हे प्रकरण घडलं त्यावेळी एनआयएनं प्रकरण हातात घेतल्यानंतर हत्येचं खरं कारण समोर आलं. त्यामुळे श्रद्धानं तक्रार मागे घेण्याबाबत त्यावेळीच्या सरकारमधील प्रमुखांचा दबाव होता का? असा प्रश्न भातखळकरांनी विचारला. यावर उत्तर देताना देवेंद्र फडणवीस यांनी म्हटलं की, श्रद्धा वालकर हत्या प्रकरण हे मानवतेला काळीमा फासणारं आहे. माझी तिच्या वडिलांशी भेट झाली आहे. त्यांनी मला संपूर्ण घटनाक्रम सांगितला. ज्या फ्रीजमध्ये गुन्हेगारानं तुकडे ठेवले होते तिथंच ठेवलेले कोल्ड्रिंक तो पित होता. तसंच या प्रकरणात राजकीय दबाव आढळून आलेला नसल्याचंही फडणवीसांनी स्पष्ट केलं. श्रद्धानं तक्रार दाखल केली आणि एक महिन्यानंतर अर्ज मागे घेतला होता. आम्ही आता त्या एक महिन्यात पोलिसांनी नेमकी काय करवाई केली याची चौकशी करत आहोत. आम्ही पोलीस महासंचालकांच्या अध्यक्षतेखाली समिती नेमली असल्याची माहितीही फडणवीसांनी दिली.
श्रद्धाला 23 नोव्हेंबर 2022 ला मारहाण झाली होती त्याबाबत तिनं पोलिसांत तक्रार दाखल केली होती. मग एक महिना पोलीस काय करत होते? असा सवाल भाजप आमदार आशिष शेलार यांनी उपस्थित केला. तसंच वालकर यांच्या सेटलमेंटच्या पत्रावर खाडाखोड असल्याचा मुद्दा देखील शेलार यांनी उपस्थित केला. त्यावर एक विशेष पथक तयार करुन चौकशी केली जाईल अशी घोषणा फडणवीसांनी केली.
One Comment