नाशिकमध्ये खासगी बसला भीषण आग; 11 जणांचा जागीच मृत्यू, जखमींवर उपचार सुरू
नाशिक | Nashik Accident – औरंगाबाद रस्त्यावर आज (8 ऑक्टोबर) पहाटे डंपर आणि खासगी बसचा मोठा अपघात झाला आहे. डंपर-खासगी बसच्या अपघातानंतर बसला आग लागल्यानं यामध्ये 11 जणांचा मृत्यू झाला आहे. यात लहान मुलासह आईचाही समावेश आहे. तसंच मृतांची संख्या वाढण्याची शक्यता आहे. अपघातग्रस्त बस क्रेनच्या सहाय्यानं घटनास्थळावरून हलविण्यात आली. यावेळी लहान बाळासह दोन मृतदेह आढळल्यानं मृतांचा आकडा 11 वर गेला आहे.
डंपर आणि खासगी बसचा अपघात झाल्यानंतर डिझेलची टाकी फुटल्यानं बसनं पेट घेतल्याचं सांगितलं जातंय. अपघातग्रस्त बस चिंतामणी ट्रॅव्हलची असल्याची प्राथमिक माहिती आहे. यवतमाळहून ही बस मुंबईला निघाली होती. पहाटे पाचच्या सुमारास पंचवटीतील हॉटेल मिरची चौकात तिला कोळश्याने भरलेल्या डंपरने धडक दिली. अपघातानंतर बसने पेट घेतला. गाढ झोपेत असणारे प्रवाशांचा अक्षरश कोळसा झाला. बसमध्ये 20 ते 25 प्रवासी असल्याचा अंदाज आहे. काहींनी उड्या मारल्याने ते बचावल्याचं प्रत्यक्षदर्शींनी सांगितलं आहे. या घटनेची माहिती समजल्यानंतर अग्निशमन दलाचे बंब घटनास्थळी दाखल झाले. अर्धा ते पाऊण तास पेटलेली बस विझवण्याचे प्रयत्न सुरू होते. मृत प्रवाशांचे मृतदेह मनपाच्या सिटीलिंक बसमधून हलविण्यात आले आहेत.
दरम्यान, या अपघातात 38 प्रवासी जखमी झाले असून त्यांना जिल्हा शासकीय रुग्णालयात दाखल करण्यात आलं आहे, अशी माहिती निवासी उपजिल्हाधिकारी भगवान डोईफोडे यांनी दिली आहे.
