सुबोध भावेबरोबरच्या ‘त्या’ रोमँटिक सीनबद्दल प्रियदर्शिनीनं केलं भाष्य; म्हणाली, “तो मला कोपऱ्यात नेऊन…”
मुंबई | Priyadarshini Indalkar – अभिनेता सुबोध भावे (Subodh Bhave) आणि अभिनेत्री प्रियदर्शिनी इंदलकर (Priyadarshini Indalkar) यांचा ‘फुलराणी’ (Phulrani) हा चित्रपट लवकरच प्रेक्षकांच्या भेटीस येत आहे. नुकतंच या चित्रपटातील ‘तुझ्या सोबतीचे’ हे गाणं प्रदर्शित झालं आहे. या गाण्यात सुबोध व प्रियदर्शिनीची रोमँटिक केमिस्ट्री पाहायला मिळत आहे. त्यांची ही केमिस्ट्री प्रेक्षकांच्या पसंतीस पडत आहे. तसंच आता प्रियदर्शिनीनं सुबोधबरोबरच्या रोमँटिक सीनबद्दल (Romantic Scene) भाष्य केलं आहे.
‘मज्जा’ला दिलेल्या मुलाखतीत प्रियदर्शिनीनं सांगितलं की, “मी सेटवर गेल्यावर मला प्रश्न पडलेला की मी सुबोधला दादा म्हणू की सर म्हणू. कारण त्याला सर म्हटलं तर ते खूपच फॉर्मल होतं आणि दादा म्हटलं तर लव्ह सीन कसे करायचे, असे प्रश्न मला पडले होते. पण नंतर सुबोध हा दादा कधी झाला, ते मलाच कळलं नाही.”
“आम्ही पहिलाच सीन शूट केला तो होता रोमँटिक सीन. त्यावेळी पहिलाच सीन असा कसा करायचं, असं मला वाटतं होतं. मी रिहर्सल केली आणि सीन सुरू झाला. मी सुबोध दादाच्या डोळ्यांत पाहिलं तर तो कॅरेक्टरमध्ये होता. तो त्या सीनसाठी कोणत्याही रिहर्सलशिवाय तयार होता. त्यामुळे मलाच मेहनती घ्यावी लागणार हे मला कळलं होतं.”
“प्रेम ही अवघड भावना असून ती तुम्हाला फील करावी लागते. तुमच्याकडे दुसरा पर्याय नसतो. तसंच मला नेममी रिहर्सल करावी लागायची, पण तो नेहमी टेकमध्ये प्रेमात पडलेला असायचा. त्यामुळे त्याला जास्त मेहनत घ्यावी लागायची नाही. सीनमध्ये तो किती प्रेमात आहे, हे दिसायचं आणि सीन कट झाला की तो म्हणायचा, ए चल तुला जोक सांगतो. सेटवर त्यानं खूप कंफर्ट झोन तयार केला होता. मी जेव्हा जेव्हा घाबरलेले असायचे, तेव्हा मला तो कोपऱ्यात नेऊन सगळं व्यवस्थित चाललंय हे सांगायचा. प्रेशर घ्यायचं नाही, हे सगळं असणार आहे त्यामुळे त्यापुढे जाऊन आपण काम करायचं”, असा सल्लाही सुबोधनं दिल्याचं प्रियदर्शिनीनं सांगितलं.
