राष्ट्रवादीत चाललंय तरी काय? रोहित पवार-अजित पवारांमध्ये लंच पे चर्चा, भेटीमुळे चर्चांना उधाण..
मुंबई : (Rohit Pawar Meet Ajit Pawar) शरद पवार अन् अजित पवार यांच्या गटातील नेत्यांमधील भेटीगाठीमुळे राष्ट्रवादीत नेमकं चाललंय तरी काय असा सर्वसामान्यांच्या मनात सवाल उपस्थित झाल्याशिवाय राहणार नाही. आज शरद पवार गटाचे कर्जत-जामखेडचे आमदार रोहित पवार यांनी राज्याचे उपमुख्यमंत्री अजित पवार यांच्या विधीमंडळातील दालनात अर्ध्या तास चर्चा केल्याची माहिती समोर आली आहे.
आमदार रोहित पवार उपमुख्यमंत्री अजित पवार यांच्या भेटीमागे मतदारसंघातील वेगवेगळ्या विषयावर चर्चा करण्यासाठी ही भेट घेतली असल्याची प्राथमिक माहिती समोर आली आहे. यावेळी कर्जत -जामखेडमधील एमआयडीसीच्या मुद्दावर चर्चा झाली असल्याचा अंदाज वर्तवण्यात येत आहे. अर्धा तास या दोघांमध्ये चर्चा झाली.
अजित पवार यांच्यासह ८ आमदांरानी शिवसेना-भाजपला समर्थन देत मंत्रीपदाची शपथ घेतली आहे. त्यानंतर राष्ट्रवादी पक्षात मोठी फुट पडली. त्यानंतर रोहित पवार यांनी शरद पवार यांना पाठिंबा दिला आहे. तर या फुटीनंतर आज रोहित पवार यांनी अजित पवारांची भेट घेतल्यानंतर राजकीय वर्तुळात चर्चेला उधाण आलं आहे.
