‘द केरळ स्टोरी’ वर सामनातून टीका; थेट कश्मीर फाईल्सचा दुसरा भाग म्हणून संबोधले
The Kerala Story : चित्रपट निर्माते विपुल अमृतलाल यांचा ‘द केरळ स्टोरी’ हा चित्रपट सध्या चर्चेत आहे. या चित्रपटाच्या प्रदर्शनाला नऊ दिवस झाले. चित्रपटाने नऊ दिवसात बजेटच्या दुप्पट कमाई केल्याचे समोर आले आहे. मात्र, चित्रपट बॉक्स ऑफिसवर करत असलेली कमाई एका बाजूला आणि चित्रपटावरुन सुरु असलेला वाद एका बाजूला. चित्रपटावरून सुरू असलेला वाद अद्याप थांबलेला नाही.
फक्त भारतामध्येच नाही तर द केरळ स्टोरी हा चित्रपट विदेशात देखील धमाल करताना दिसत असला तरी वाद अजून कायम आहे. 37 देशांमध्ये 12 मेला द केरळ स्टोरी हा चित्रपट रिलीज झाला असला तरी अनेकजण हे अजूनही द केरळ स्टोरी या चित्रपटाला विरोध करताना दिसत आहेत. इतर राज्यांप्रमाणे महाराष्ट्रात देखील यावरून वाद सुरु आहेत. नुकताच संजय राऊत यांनी देखील द केरळ स्टोरी चित्रपटाबद्दल लिहिले आहे आणि थेट द कश्मीर फाईल्स चित्रपटाचा दुसरा भाग हा द केरळ स्टोरी असल्याचे म्हटले आहे.
सामनामध्ये साप्ताहिक रोखठोक स्तंभात संजय राऊत यांनी द केरळ स्टोरी चित्रपटाला भाजपचा प्रचार करणारा चित्रपट थेट म्हटले आहे आणि द कश्मीर फाईल्सचा दुसरा भाग देखील म्हटले. भाजपाने कर्नाटक निवडणुकीपूर्वी हिंदू आणि मुस्लिमांचे ध्रुवीकरण करण्यासाठी द केरळ स्टोरी चित्रपटाला वापर केल्याचे त्यांनी म्हटले असून ही चांगली गोष्ट नसल्याचे म्हटले आहे. द केरळ स्टोरी हा चित्रपट खरोखरच खऱ्या घटनेवर आधारित आहे का? हा देखील मोठा प्रश्न राऊतांची उपस्थित केलाय.
पुढे त्यांनी लिहिले की, खरोखरच केरळमध्ये हिंदू मुलींनी इस्लाम धर्म स्वीकारलाय? 32 हजार हिंदू आणि ईसाई मुली या ISIS मध्ये खरोखरच भर्ती झाल्या आहेत? द केरळ स्टोरी चित्रपटाचे निर्देशन हे सुदीप्तो सेन यांनी केले आहे. काही दिवसांपूर्वी दिलेल्या एका मुलाखतीमध्ये सुदीप्तो सेन यांनी हा चित्रपटाच्या स्टोरीवर सात वर्ष काम केले असून सर्व कागदपत्रे असल्याचा देखील दावा केला.
