नेदरलँड टी-२० विश्वचषक 2022ची पुनरावृत्ती करणार? का दक्षिण आफ्रिका पराभवाचा बदला घेणार!
South Africa vs Netherlands ICC Cricket World Cup 2023 : एकदिवसीय विश्वचषकाच्या १५व्या सामन्यात आज दक्षिण आफ्रिकेचा सामना नेदरलँडशी होत आहे. धरमशाला येथील हिमाचल प्रदेश क्रिकेट असोसिएशन स्टेडियमवर हा सामना खेळला जात आहे. नेदरलँड संघाने शेवटचे दोन्ही सामने गमावले आहेत, तर दक्षिण आफ्रिकेच्या संघाने शेवटचे दोन्ही सामने जिंकले आहेत. दक्षिण आफ्रिकेचे कर्णधार टेम्बा बावुमा तर नेदरलँड्सचे नेतृत्व स्कॉट एडवर्ड्सकडे आहे. दक्षिण आफ्रिकेने नाणेफेक जिंकून प्रथम गोलंदाजी करण्याचा निर्णय घेतला.
विश्वचषक स्पर्धेत आतापर्यंत उत्कृष्ट फॉर्ममध्ये असलेल्या दक्षिण आफ्रिकेने प्रतिस्पर्धी संघांसाठी धोक्याची घंटा वाजवली असून मंगळवारी नेदरलँड्सवर शानदार विजय नोंदवून आपले स्थान आणखी मजबूत करण्याचा त्यांचा प्रयत्न असेल. गेल्या दोन सामन्यांमध्ये दक्षिण आफ्रिकेने दाखवून दिले की त्यांचा संघ आता ‘चोकर्स’ (दडपणाला बळी पडून) हा टॅग काढून टाकण्यासाठी सज्ज आहे.
२०२२च्या टी२० विश्वचषकात नेदरलँड्सविरुद्धच्या पराभवाचा बदला घेऊन मोठ्या फरकाने विजय मिळवण्याकडे दक्षिण आफ्रिकेचे लक्ष असेल. टी२० विश्वचषक २००९ मध्ये लॉर्ड्सवर इंग्लंडचा पराभव करून नेदरलँड्सने अस्वस्थता निर्माण केली होती. यानंतर, २०२२ टी२० विश्वचषकाच्या सुपर-१२ फेरीत, नेदरलँड्सने टेम्बा बावुमाच्या नेतृत्वाखालील दक्षिण आफ्रिकेच्या संघाचा पराभव केला आणि त्यांना विश्वचषकातून बाहेर काढले होते. त्यामुळे नेदरलँड टी२० विश्वचषक 2022ची पुनरावृत्ती करणार? का? दक्षिण आफ्रिका पराभवाचा बदला घेणार, हे पाहाणं महत्त्वाचं ठरणार आहे.
