मुंबई : (Adani Enterprises Group) अमेरिकेतील रिसर्च फर्म हिंडेनबर्गने प्रसिद्ध केलेल्या अहवालानंतर अडचणीत सापडलेल्या अदानी समूहाला (Adani Group) आज मोठा दिलासा मिळाला आहे. दोन जागतिक रेटिंग कंपन्यांनी अदानी समूहाला दिलासा देणारी बातमी दिल्यानंतर अदानी समूहाची फ्लॅगशिप कंपनी अदानी एंटरप्रायझेसच्या (Adani Enterprises) शेअर्समध्ये तेजी दिसून आली. आज दिवसभरातील व्यवहारात अदानी एंटरप्रायझेसने नीचांकी पातळीवरून उसळण घेतली.
फिच रेटिंग्स आणि मूडीज या जागतिक पातळीवरील रेंटिंग कंपन्यांनी म्हटले की, अदानी समूहाच्या सध्याच्या स्थितीमुळे त्यांच्या रेटिंग्सवर कोणताही परिणाम होणार नाही. अदानी समूहातील कंपन्यांच्या शेअर दरावर आमची नजर असल्याचेही त्यांनी सांगितले. अदानी समूहाच्या रेटिंगमध्ये बदल करायचा असल्यास त्याच्या सर्व पैलूंचा अभ्यास केला जाईल. त्याशिवाय, कोणताही बदल केला जाणार नाही असेही फिच आणि मूडीजने म्हटले.
Moody’s Investors Service या एजन्सीने म्हटले की, अदानी समूहातील कंपन्यांच्या आर्थिक लवचिकतेबाबत अभ्यास सुरू असल्याचे म्हटले. हिंडेनबर्ग अहवालामुळे उद्भवलेल्या कठीण परिस्थितीत अदानी समूहाच्या कंपन्यांना त्यांच्या आर्थिक जबाबदाऱ्या पूर्ण करण्यासाठी एक किंवा दोन वर्षांसाठी निधी उभारणे कठीण जाईल. ते म्हणाले की अदानी समूहाला भांडवली खर्च किंवा कर्ज परतफेडीसाठी निधीची आवश्यकता असेल, असेही कंपनीने म्हटले.