नाशिक : (Aditya Thackeray’s Shiv Samvad in Nashik) मुख्यमंत्री एकनाथ शिंदेंनी शिवसेनेविरोधात बंड पुकारल्यानंतर नाशिक जिल्ह्यातील दोन आमदार आणि एक खासदार त्यांच्या गोटात सामील झाले. मात्र, शिवसेनेचे पदाधिकारी, नगरसेवक आणि शिवसैनिक अजूनही सेनेतच असल्याचं युवासेना प्रमुख आदित्य ठाकरे यांच्या नाशिक दौऱ्यात दिसलं. आदित्य यांच्या स्वागतावेळी जोरदार शक्तीप्रदर्शन आणि शिंदे गटात सामील झालेले खासदार हेमंत गोडसे यांच्याविरोधात उत्स्फूर्तपणे दिल्या जाणाऱ्या घोषणांतून नाशिक हा सेनेचा गड भक्कम असल्याचं स्पष्ट झालं.
मुंबई, ठाणे, औरंगाबाद, कोल्हापूरनंतर नाशिक शहराने शिवसेनेला कायमच भक्कमपणे साथ दिली आहे. नाशिक येथे शिवसेनाप्रमुख बाळासाहेब ठाकरे यांच्या उपस्थितीत झालेल्या अधिवेशनानंतरच राज्यात प्रथमच सेना-भाजप युतीची सत्ता आली होती, हा इतिहास आहे. आपलीच शिवसेना खरी असल्याचा दावा करीत एकनाथ शिंदे यांनी वेगळे अस्तित्व निर्माण केल्यानंतर जिल्ह्यातून माजी कृषीमंत्री दादा भुसे आणि आमदार सुहास कांदे यांनी शिंदेंना साथ दिली.
रात्री पावसामुळं मनोहर गार्डन या ठिकाणी झालेल्या मेळाव्याला हजारो शिवसैनिकांची गर्दी होती. उभे राहण्यासही जागा अपुरी पडल्यानं बाहेरही अनेक जण उपस्थित होते. महिलांची संख्याही मोठ्या प्रमाणावर असल्याचं दिसून आलं. शिवसैनिकांमध्ये सळसळणारे चैतन्य दिसून आल्यानं आदित्य यांच्या वक्तृत्वालाही धार आली. बंड, उठाव वगैरे काही नाही, तर ही गद्दारीच असून तुम्हांला हे पटलं आहे का? असा प्रश्न विचारल्यावर घोषणाबाजीने सभागृह दणाणून गेलं. मिळणाऱ्या प्रतिसादामुळं देहबोली पूर्णपणे बदललेल्या आदित्य यांच्या बोलण्यातील आत्मविश्वास मंचावर उपस्थित पदाधिकाऱ्यांनाही भारावून गेला. एक नवीन आदित्य पाहावयास मिळाले, ही त्यापैकी काही पदाधिकाऱ्यांची प्रतिक्रिया बोलकी म्हणावी लागेल. यामुळं आदित्य ठाकरे यांच्या दौऱ्यात नवीन जोष, नवा उत्साह दिसला.