मुंबई | Amol Khole’s Post In Discussion – सध्या ऐतिहासिक चित्रपटांकडे प्रेक्षकांचा ओढा वाढला आहे. त्यामुळे मराठीमध्ये एकापोठापाठ एक सुपरहीट ऐतिहासिक चित्रपट प्रदर्शित होत आहेत. अशामध्येच आता अभिनेते डॉ. अमोल कोल्हे यांनी नव्या ऐतिहासिक चित्रपटाची घोषणा केली आहे, ‘गरुडझेप’ असं या चित्रपटाचं नाव आहे. या चित्रपटाचा टीझरही प्रदर्शित करण्यात आला आहे. तसंच या चित्रपटाच्या चित्रीकरणादरम्यानचा एक व्हिडीओ अमोल कोल्हे यांनी त्यांच्या इन्स्टाग्राम अकाऊंटवर शेअर केला आहे.
अमोल कोल्हे यांनी एक व्हिडीओ शेअर केला आहे. हा व्हिडीओ शेअर करत त्यांनी कॅप्शनमध्ये म्हटलं आहे की, “अशा वातावरणात चित्रीकरण करणं म्हणजे वेडेपणा आहे. आग्र्याच्या लाल किल्ल्यात चित्रीकरण? कसं शक्य आहे? अनेकांच्या अनेक शंका…पण प्रत्यक्ष इतिहास जणू 356 वर्षांनंतर त्या घटनेला कॅमेऱ्याच्या लेन्समधून पाहणार होता. एएसआय नियमावलीचे पालन करता करता होणारी दमछाक, त्यात सकाळी 9 वाजता 38-40 डिग्री तापमान. चुकून टाचणी विसरली तरी किल्ल्यातून बेस कॅम्पपर्यंत पायपीट, ना बसायला खुर्ची ना पंखा. सावलीसाठी आडोशाला उभं राहावं तर घामाच्या धारा आणि जरा हवेशीर ठिकाणी उभं राहावं तर उन्हाच्या झळा. रोज 4-5 जणं अंथरूण धरायचे नाहीतर थेट रूग्णालयामध्ये भरती. तरी पुन्हा दुसऱ्या दिवशी सकाळी ‘बचेंगे तो और भी लडेंगे’ या ईर्षेने चित्रीकरण सुरु,” अमोल कोल्हेंची ही पोस्ट सध्या चांगलीच चर्चेत आहे.
दरम्यान, अमोल कोल्हे यांनी या चित्रपटाच्या टीमचं भरभरून कौतुक केलं आहे. जगदंब क्रिएशन्स प्रस्तुत या चित्रपटाची निर्मिती स्वतः अमोल कोल्हे यांनीच केली आहे. तसंच चित्रपटाचे दिग्दर्शन कार्तिक राजाराम केंढे यांनी केलं आहे. सप्टेंबरमध्ये हा चित्रपट बॉक्स ऑफिसवर प्रदर्शित होईल.