मुंबई | उद्योजक आनंद महिंद्रा ट्विटरवर नेहमी सक्रीय असतात. ते ट्विटरवर संवाद साधणाऱ्यांना किंवा मदत मागणाऱ्यांना उत्तर देत असतात. तसंच भारतातील व्यावसायिक संस्कृती, व्हायरल व्हिडीओ अशा अनेक गोष्टी ते ट्विटरला शेअर करत असतात. विशेष म्हणजे त्यांच्या उत्तरांनी अनेकदा नेटकऱ्यांची मनं जिकली आहेत. यावेळी आनंद महिंद्रा यांना वाहननिर्मितीत स्पर्धक असणाऱ्या टाटा मोटर्स कंपनीबद्दल विचारण्यात आलं असता त्यांनी दिलेल्या उत्तराची चर्चा सुरु आहे.
एका युजरने ट्विटरला आनंद महिंद्रा यांना प्रश्न विचारला होता. लेखक हरिंदर सिक्का यांनी ट्वीट करत महिंद्राच्या XUV700 चं कौतुक केलं होतं. उत्तम सुरक्षा वैशिष्ट्ये, स्टीयरिंग, सीट, लेग स्पेस, गॅझेट्स आणि सेन्सर्स असल्याचं त्यांनी ट्वीटमध्ये सांगितलं होतं. यावर आनंद महिंद्रा यांनी कोणताही पक्षपात न करणाऱ्या लोकांकडून सर्वात चांगली प्रतिक्रिया मिळत असते सांगत हरिंदर यांचे आभार मानले. तसंच आपल्या ऑटो टीमला याचं श्रेय दिलं आहे.
यानंतर एका युजरनं कमेंट सेक्शनमध्ये “टाटा कार्सबद्दल तुमच्या भावना काय आहेत?” अशी विचारणा केली. यावर आनंद महिंद्रा यांनी उत्तर देत सांगितलं की, “टाटा मोटर्ससारखे तगडे स्पर्धेक असणं आमच्यासाठी अभिमानास्पद आहे. ते नेहमीच नव्याने स्वत:ला शोधत असतात आणि यामुळे आम्हाला आणखी चांगलं करण्याची प्रेरणा मिळते. स्पर्धेमुळे नवनिर्मितीला चालना मिळते”.