पुणे : उद्या (शनिवार) मनसे अध्यक्ष राज ठाकरे सकाळी साडेआठच्या सुमारास पुण्यावरुन औरंगाबादच्या दिशेने रवाना होणार आहेत. पण त्यापूर्वी साडेसात वाजण्याच्या सुमारास १०० ते १५० ब्राह्मण पुढील कार्य चांगल्याप्रकारे पार पाडावे यासाठी राज ठाकरेंना आशीर्वाद देण्यासाठी येणार आहेत, अशी माहिती मनसेचे पुणे शहर अध्यक्ष माजी नगरसेवक साईनाथ बाबर यांनी दिली आहे.
राज ठाकरे यांनी मुंबईत झालेल्या सभेत मशिदीवरील भोंगे याबाबत भूमिका जाहीर केल्यानंतर राजकीय वातावरण चांगलंच तापलं. मात्र आता राज ठाकरेंची औरंगाबाद येथे एक मे रोजी म्हणजेच महाराष्ट्र दिनी जाहीर सभा होणार असून त्याकडे सर्वच राजकीय पक्षांचं लक्ष लागून राहिलं आहे. राज ठाकरेंच्या औरंगाबाद दौऱ्याला रवाना होण्यासंदर्भात मनसे पुणे शहर अध्यक्ष साईनाथ बाबर यांनी माहिती दिली. मुंबई येथून राज ठाकरेंचे दुपारी साडेतीन वाजण्याच्या सुमारास पुण्यातील ‘राजमहाल’ येथील निवासस्थानी आगमन झाले आहे. त्यावेळी कार्यकर्ते देखील उपस्थित होते. तसंच आज संध्याकाळी राज काही मनसे पदाधिकाऱ्यांची बैठक घेणार असल्याचं देखील सांगितलं जातं आहे.