पुणे : काँग्रेस पक्षाचे नेते आणि मंत्री विश्वजीत कदम यांचे सासरे अविनाश भोसले यांच्या घरावर सीबीआयने छापा टाकला आहे. अविनाश भोसले यांच्या पुण्यातील बाणेर येथील प्रासादतुल्य निवासस्थान आणि शहरातील इतर मालमत्तांवर ही कारवाई करण्यात आली आहे. तसंच सीबीआयच्या या छापेमारीमुळे राजकीय आणि बांधकाम क्षेत्रात एकच खळबळ उडाली आहे. अविनाश भोसले यांची सीबीआयकडून सध्या कसून चौकशी केली जात आहे. सोबतच भोसले यांच्यासह विनोद गोएंका आणि शाहीद बालवा यांच्यावरही सीबीआयकडून कारवाई केली जात आहे.
अविनाश भोसले हे एबीआयएल ग्रुप ऑफ कंपनीचे प्रमुख असून ते पुण्यातील प्रसिद्ध बांधकाम व्यावसायिक म्हणून ओळखले जातात. त्यांचे महाराष्ट्रातील अनेक राजकीय नेत्यांशी जवळचे संबध आहेत. ते अनेक राजकीय नेत्यांच्या संपर्कात असतात. तसंच काँग्रेसचे नेते विश्वजीत कदम हे त्यांचे जावई आहेत. येस बँक आणि डीएचएफएल बँक गैरव्यवहार प्रकरणी ही कारवाई झाली असून मुंबई आणि पुण्यातील आठ ठिकाणी सीबीआयने छापे टाकले आहेत. डेक्कन जिमखाना तसेच गणेशखिंड रस्त्यावरील त्यांच्या बांधकाम कंपनीच्या कार्यालयाची देखील झडती घेतली जात आहे. काही महत्त्वाची कागदपत्रे सीबीआयने जप्त केली आहेत.