महामेट्रो प्राधिकरणाने स्वारगेट-कात्रज मेट्रोच्या विस्तारात महत्त्वपूर्ण बदल जाहीर केले आहेत. या विस्तारित मेट्रो मार्गाचे भूमिपूजन दोन महिन्यांपूर्वी पंतप्रधान नरेंद्र मोदी यांच्या हस्ते ऑनलाईन पद्धतीने करण्यात आले. सिव्हील कोर्ट ते स्वारगेट या भुयारी मेट्रो मार्गाचे लोकार्पण झाल्यानंतर स्वारगेट ते कात्रज या भुयारी मेट्रो मार्गाचे भूमिपूजन झाले. या विस्तारीकरणाच्या मेट्रो प्रकल्पात तीन मेट्रो स्टेशन उभारण्यात येणार होती. मात्र लोकप्रतिनिधी तसेच नागरिकांची मागणी लक्षात घेऊन या मार्गावर चौथे मेट्रो स्टेशन देखील आता उभारले जाणार आहे.
बालाजीनगर येथे हे नवीन स्थानक उभारण्याचा निर्णय महामेट्रोने घेतला असून, यासाठी पुणे महापालिकेने तत्त्वत: मान्यता दिली आहे. मात्र या निर्णयामुळे खर्चाचा बोजा वाढणार आहे. प्रकल्पाची किंमत ₹ २०० ते ३०० कोटींनी वाढण्याची अपेक्षा आहे.
या मेट्रो मार्गावर आता तीनऐवजी चार स्थानके होणार असल्याने बालाजीनगर, धनकवडी या परिसरातील प्रवाशांना दिलासा मिळाला आहे. नवीन स्थानक उभारताना त्याचा आर्थिक भार महापालिका घेणार नाही, या अटीवर ही परवानगी देण्यात येणार आहे. त्यामुळे या नवीन स्थानकाचा खर्च महामेट्रोला करावा लागणार आहे.
स्वारगेट ते कात्रज या मेट्रो मार्गाच्या सविस्तर प्रकल्प अहवालामध्ये (डीपीआर) मार्केटयार्ड, पद्मावती, कात्रज अशी तीन स्थानके प्रस्तावित करण्यात आली आहेत. पद्मावतीनंतर थेट कात्रजला मेट्रोचे स्थानक असल्याने धनकवडी, बालाजीनगर परिसरातील प्रवाशांची अडचण होण्याची शक्यता होती. यापूर्वी पालिकेच्या सर्वसाधारण सभेत झालेल्या ठरावाला अनेक वर्षे झाल्याने महामेट्रोने पालिका आयुक्त डॉ. राजेंद्र भोसले यांच्याकडे नवीन ठराव करून देण्याची विनंती केली होती.