पुणे | Pune Ganesh Visarjan 2023 | यंदाच्या वर्षी पुण्यातील (Pune) गणपती विसर्जन (Ganesh Visarjan) मिरवणुकीचा कालावधी कमी करण्याच्या उद्देशानं श्रीमंत दगडूशेठ हलवाई गणपती (Dagdusheth Halwai Ganpati) मंडळानं सायंकाळी 4 वाजताच मिरवणुकीत सहभागी होणार असल्याचा निर्णय घेतला आहे. तर हा निर्णय दगडूशेठ गणपती मंडळाचा वैयक्तिक निर्णय असल्याचं चार मोठ्या मंडळांनी म्हटलं आहे. तसंच आम्ही आमच्या नेहमीच्या नियोजित वेळेत म्हणजेच सहा नंतरच विसर्जन मिरवणुकीत सहभागी होणार असल्याचं अखिल मंडई मंडळाचे अध्यक्ष अण्णा थोरात यांनी पत्रकार परिषद घेत सांगितलं आहे.
या पत्रकार परिषदेला हुतात्मा बाबू गेनू गणपती मंडळ ट्रस्टचे बाळासाहेब मारणे, श्रीमंत भाऊसाहेब रंगारी गणपती ट्रस्टचे उत्सवप्रमुख पुनीत बालन, श्री जिलब्या मारूती मंडळ ट्रस्टचे भूषण पंड्या आदी उपस्थि होते. दगडूशेठ गणपती मंडळानं निर्णय घेतल्यानंतर या इतर मंडळांनी संयुक्त पत्रकार परिषद घेत हा मोठा निर्णय घेतला. तसंच दगडूशेठ गणपती मंडळानं घेतलेला निर्णय हा वैयक्तिक असून आम्हाला त्यांच्या निर्णयाविषयी कोणताही आक्षेप नाहीये, अशी माहितीही पत्रकार परिषदेत देण्यात आली.
मंडळांना दरवर्षीच्या नियोजीत वेळेआधी निघणं शक्य होत नाही. कारण मानाच्या गणपती मंडळांच्या मिरवणुकीनंतर इतर गणपती मंडळं लक्ष्मी रस्त्यानं मिरवणुकीमध्ये मार्गस्थ होत असतात. त्यामुळे ती मंडळं पुढे जाईपर्यंत इतर मंडळांना लवकर जाणं शक्य होणार नाही. तसंच दगडूशेठ गणपती मंडळानं घेतलेल्या निर्णयाबाबत आम्हाला कोणताही आक्षेप नाहीये. त्यांच्याबद्दल आम्हाला आदर आहे. पण विसर्जन मिरवणुकीत सहभागी होण्याबाबत आपली भूमिका वेगळी असल्याचं मंडळांनी पत्रकार परिषदेत स्पष्ट केलं आहे.