मुंबई इंडियन्स आणि कोलकाता नाईट रायडर्स यांच्यात झालेल्या पहिल्या सामन्यात कोलकाताने मुंबईचा पराभव केला होता. या सामन्यात कोलकात्याच्या पॅट कमिन्सने डॅनियल सॅम्सच्या एका षटकात ३५ धावांचा पाऊस पाडला होता. सॅम्सचे ते षटक आयपीएलच्या सर्वात महागड्या षटकांपैकी एक आहे. याआधीही एका षटकात ३० पेक्षा जास्त धावा निघाल्या आहेत.
मुंबई : हर्षल पटेल : रॉयल चॅलेंजर्स बंगळुरूचा वेगवान गोलंदाज हर्षल पटेलने एका षटकात तब्बल ३७ धावा खर्च केल्या होत्या. चेन्नईच्या रवींद्र जडेजाने २०२१ मध्ये हर्षल पटेलची गोलंदाजी फोडून काढली होती.
या षटकात तब्बल ३७ धावा निघाल्या होत्या. आयपीएलमधील हे सर्वात महागडे षटक होय. विशेष म्हणजे त्या हंगामात हर्षल पटेलला ‘पर्पल कॅप’ मिळाली होती.
प्रशांत परमेश्वरन : २०११ मध्ये कोची टस्कर्सच्या प्रशांत परमेश्वरनच्या एका षटकात ३७ धावा निघाल्या होत्या. बंगळुरूच्या फलंदाजांनी प्रशांतच्या एका षटकात ३७ धावा वसूल केल्या होत्या. आयपीएलमधील सर्वात महागड्या षटकांपैकी हे एक होय.
परविंदर आवाना : एका षटकात सर्वाधिक धावा देणार्‍या गोलंदाजांमध्ये परविंदर आवाना याचाही समावेश आहे. २०१४ मध्ये पंजाब किंग्जच्या परविंदरनेे एका षटकात ३३ धावा मोजल्या होत्या. चेन्नई आणि पंजाब यांच्यात वानखेडे स्टेडियमवर झालेल्या सामन्यात परविंदरच्या गोलंदाजीवर धावांचा पाऊस पडला होता.
रवी बोपारा : इंग्लंडचा माजी अष्टपैलू खेळाडू रवी बोपाराचाही या नकोशा विक्रमामध्ये समावेश आहे. रवी बोपाराने एका षटकात ३३ धावा दिल्या होत्या. पंजाब आणि कोलकाता यांच्यात हा सामना रंगला होता.