भारतीय तेल विपणन कंपन्यांनी लिक्विफाइड पेट्रोलियम गॅस (LPG) कमर्शियल सिलिंडरच्या दरामध्ये वाढ केली आहे. आजपासून नवा महिना सुरू झाला असून डिसेंबर महिना सुरू होताच गॅस सिलिंडरचे दर महागले आहेत. सरकारी तेल कंपन्या दर महिन्याच्या पहिल्या दिवशी एलपीजी सिलिंडरच्या किमतींचा आढावा घेतात आणि त्याअंतर्गत इंडियन ऑइल कॉर्पोरेशनने गॅसच्या किमती वाढवल्या आहेत. ही वाढ १९ किलोच्या व्यावसायिक एलपीजी सिलिंडरसाठी करण्यात आली असून सामान्य एलपीजी म्हणजेच घरगुती १४.२ किलो गॅस सिलिंडरच्या दरात कोणताही बदल करण्यात आलेला नाही. व्यावसायिक LPG सिलिंडरचे नवीन दर १ डिसेंबर २०२४ पासून देशभरात लागू झाले आहेत.
देशातील चार प्रमुख शहरांतील एलपीजीच्या किंमती?
- दिल्लीत १९किलोच्या व्यावसायिक एलपीजी सिलिंडरच्या किंमतीत १६.५० रुपयांनी वाढ झाली असून ती १८१८.५० रुपये प्रति सिलेंडरवर आली आहे.
- मुंबईत १९ किलोच्या व्यावसायिक एलपीजी सिलिंडरच्या दरात १६.५० रुपयांनी वाढ झाली असून तो १७७१ रुपये प्रति सिलिंडरवर आला आहे.
- चेन्नईमध्ये व्यावसायिक एलपीजी सिलिंडरची किंमत १६ रुपयांनी वाढली असून ती १९८०.५० रुपये प्रति सिलिंडरवर आली आहे.
- कोलकातामध्ये १९ किलोच्या व्यावसायिक एलपीजी सिलिंडरची किंमत १५.५० रुपयांनी वाढली असून ती १९२७ रुपये प्रति सिलेंडरवर आली आहे.
विशेष बाब म्हणजे देशातील चार प्रमुख मेट्रो शहरांपैकी फक्त कोलकाता येथे गॅस सिलिंडर सर्वाधिक दरात उपलब्ध आहेत. व्यावसायिक गॅस सिलिंडरचे दर सलग पाच महिन्यांपासून वाढत आहेत. व्यावसायिक गॅस सिलिंडरच्या किमती ऑगस्टपासून सातत्याने वाढत आहेत आणि डिसेंबरसह सलग पाच महिने १९ किलो गॅसच्या किमतीत वाढ झाली आहे.
नोव्हेंबर आणि ऑक्टोबरमध्ये एलपीजीचे दर किती वाढले?
१ नोव्हेंबरपासून इंडियन ऑइलने व्यावसायिक एलपीजी गॅस सिलिंडरची किंमत ६२ रुपयांनी वाढवून दिल्लीमध्ये प्रति सिलेंडर १८०२ रुपये केली होती. ऑक्टोबरमध्ये व्यावसायिक गॅसच्या दरात प्रति सिलेंडर ४८.५० रुपयांनी वाढ करण्यात आली होती.