जळगाव | Girish Mahajan On Eknath Khadse – ग्रामविकासमंत्री गिरीश महाजन (Girish Mahajan) यांनी राष्ट्रवादीचे नेते एकनाथ खडसे (Eknath Khadse) यांच्यावर निशाणा साधला. जिल्हा दूध संघातील चोरी, अपहार प्रकरणी गुन्हा दाखल व्हावा या मागणीसाठी एकनाथ खडसेंनी तब्बल नऊ ते दहा तास शहर पोलीस ठाण्यात आंदोलन केलं. यासंदर्भात बोलताना गिरीश महाजन म्हणाले, ज्याच्या विरोधात तक्रार आहे, त्यांचे जाबजबाब घेतल्यानंतर सर्व गोष्टी समोर येतीलच त्यामुळे पाच-सहा दिवस वाट बघायला हवी. त्यासाठी गुन्हा नोंदवून घेण्यासाठी एवढं नाटक करण्याची एकनाथ खडसेंना गरज काय, असा खोचक टोला गिरीज महाजन यांनी लगावला आहे. दूध संघाच्या गैरव्यवहारप्रकरणी एसआयटी चौकशीची मागणी आपण मुख्यमंत्री आणि उपमुख्यमंत्री यांच्याकडे करणार आहोत, असंही महाजन म्हणाले. ते जळगाव येथे प्रसारमाध्यमांशी बोलत होते.
भाजपचे आमदार मंगेश चव्हाण यांनी दूध संघातील गैरव्यवहाराबाबत सुरूवातील तक्रार दिली. त्यानंतर दोन दिवसांनी त्यांना सुचलं आणि त्यांनी तक्रार दाखल केली. पोलीस चौकशी करत असतानाही गुन्हा नोंद करण्यासाठी त्यांचं नाटक सुरू आहे, असंही गिरीश महाजन म्हणाले.
जिल्हा दूध संघातून एक ते दोन कोटी रूपयांचा एवढा माल बाहेर गेलाच कसा?, असा प्रश्न गिरीश महाजन यांनी उपस्थित केला. पुढे ते म्हणाले की, दूध संघाचे अध्यक्ष तसंच कार्यकारी संचालक यांच्या संमतीशिवाय ते होऊ शकत नाही. त्यामुळे ज्यांच्या विरोधात तक्रार आहे त्यांच्या जाबजबाबानंतर सर्व गोष्टी समोर येतील. पाच-सहा दिवस बघायला हवी होती, सर्व समोर येणारच आहे. त्यासाठी एवढं नाटक करण्याची गरज नव्हती. गेल्या महिन्यात दूध संघात 525 रुपये भावाचे तूप 95 रुपये दराने विक्री करण्यात आले, ती तक्रार आमच्या आमदारानेच केली, ते सिद्ध झाले यात काही जणांना निलंबित करण्यात आलं आहे, असंही महाजन म्हणाले.