पहिल्याच सामन्यात गुरू शिष्य भिडणार; आयपीएलचं वेळापत्रक जाहीर, ‘या’ दिवशीपासून होणार सुरु

नवी दिल्ली : (IPL 2023 Schedule declared) या वर्षीच्या 2023 आयपीएल 16 व्या हंगामाचे वेळापत्रक जाहीर झाले असून आयपीएलचा हा हंगाम 31 मार्चपासून सुरू होणार आहे. या हंगामातील लीगचा शेवटचा सामना 21 मे ला होणार आहे. पहिलाच सामना हा चेन्नई सुपर किंग्ज आणि गुजरात टायटन्स यांच्यात होणार आहे. यंदाच्या हंगामात आयपीएलचे 10 संघ लीग स्टेजमध्ये 70 सामने खेळणार आहे. आयपीएलचा हा कुंभमेळा जवळपास दीड महिना चालणार आहे.

आयपीएलच्या 16 व्या हंगामाची सुरूवात धमाकेदार होणार आहे. 31 मार्च 2023 ला पहिलाच सामना हा गतविजेचा गुजरात टायटन्स आणि चेन्नई सुपर किंग्ज यांच्यात होणार आहे. हा सामना गुजरातच्या नरेंद्र मोदी स्टेडियमवर होईल. या सामन्यानेच आयपीएलच्या 16 व्या हंगामाचा नारळ फुटणार आहे.

बीसीसीआयने अजून आयपीएलच्या प्ले ऑफची तारीख जाहीर केलेली नाही. लीग स्टेजमध्ये 54 मॅच डे मध्ये 70 सामने होणार आहेत. यात 18 डबलहेडर होणार असून प्रत्येक संघ 7 सामने घरच्या तर 7 सामने दुसऱ्या मैदानावर खेळणार आहेत. आयपीएलच्या 16 व्या हंगामात 10 संघांची विभागणी ही दोन ग्रुपमध्ये केली आहे. त्यामुळे यंदाचा आयपीएल फुल धमाकेबाज होणार अशा प्रतिक्रिया क्रिकेटप्रेमींकडून देण्यात येत आहेत.