मुंबई : मराठी चित्रपटसृष्टीतील प्रसिद्ध अभिनेता स्वप्निल जोशी नेहमी काहीना काही कारणांमुळे चर्चेत येत असतो. तसंच सध्या तो झी मराठी या वाहिणीवरील तू तेव्हा तशी या मराठी मालिकेत काम करताना दिसत आहे. त्याचबरोबर स्वप्निलने चाहत्यांसोबत एक खास किस्सा शेअर केला आहे. त्यामुळे तो चर्चेत आला आहे. स्वप्निलची लाडकी लेक मायराचा आज वाढदिवस आहे. या निमित्ताने त्याने एक गोड व्हिडीओ शेअर केरत खास किस्सा सांगितला आहे.
स्वप्निल जोशी हा ट्विटरवर नेहमीच सक्रीय असतो. नुकतंच त्याने मायराच्या वाढदिवसानिमित्त एक छान व्हिडीओ पोस्ट केला आहे. या व्हिडीओच्या सुरुवातीला स्वप्निल हा तिच्या मुलीच्या जन्माबद्दल काही किस्से सांगताना दिसत आहे. यावेळी तो भावूक झाल्याचंही पाहायला मिळत आहे.
“मला आठवतंय माझी मुलगी मायरा हिला जेव्हा मी पहिल्यांदा तिला माझ्या हातात घेतलं. जेव्हा पहिल्यांदा डॉक्टरांनी तिला माझ्याकडे दिलं आणि मी तिच्या डोळ्यात डोळे घालून बघितलं, तेव्हा मला असं वाटतं की तो माझ्या सुखाचा शुभारंभ होता”, असं स्वप्निलनं व्हिडीओत म्हटलं आहे. यासोबतच त्याने मायराचे काही जुने आणि नवीन व्हिडीओ एकत्र केले आहेत.