कलाकारांची पंढरी असणार्‍या बालगंधर्व रंगमंदिराचे स्थान प्रत्येक कलाकाराच्या मनात खास असे आहे. कित्येक कलाकारांची कारकीर्द याच रंगमंदिराच्या साक्षीने सुरू झालेली आहे. अशा या रंगमंदिराबाबत एक पुणेकर म्हणून आपणा सर्वांना सार्थ असा अभिमानच आहे. अशा या बालगंधर्व रंगमंदिराचा ५४ वा वर्धापनदिन प्रतिवर्षाप्रमाणे यंदाही दि. २५ ते २७ जून २०२२ रोजी नेहमीच्या दिमाखात आणि वैभवात संपन्न होणार आहे, अशी माहिती बालगंधर्व परिवाराचे अध्यक्ष मेघराज राजेभोसले यांनी दिली.,
संपूर्ण तीन दिवस सांस्कृतिक कार्यक्रम असलेला हा सोहळा पुणेकरांसाठी विनामूल्य असून, या संपूर्ण सोहळ्याचे उद्घाटन शनिवार, दि. २५ जून २०२२ रोजी दुपारी १२.३० वा. संपन्न होत आहे. बालगंधर्व रंगमंदिराच्या ५४ व्या वर्धापन दिनानिमित्त २५ ते २७ जून दरम्यान ‘ बालगंधर्व रंगमंदिर महोत्सव २०२२’चे आयोजन करण्यात आले आहे. यावेळी ज्येष्ठ अभिनेत्री ज्योती चांदेकर यांना जीवनगौरव पुरस्काराने सन्मानित करण्यात येणार आहे.
महोत्सवाबद्दल माहिती देताना मेघराज राजेभोसले म्हणाले, महोत्सवाचे उद्घाटन २५ जून रोजी दुपारी १२:३० वा. राष्ट्रवादी काँग्रेसच्या खासदार सुप्रियाताई सुळे यांच्या हस्ते होणार आहे. यावेळी माजी आ. उल्हास पवार, आ चेतनदादा तुपे, कृष्णकुमार गोयल, संजय चोरडिया (अध्यक्ष-सूर्यदत्त एज्युकेशन सोसायटी), विनय सातपुते (संचालक-वन ओटीटी प्लॅटफॉर्म), चेतन मणियार (संचालक- वन ओटीटी प्लॅटफॉर्म), दै. ‘ राष्ट्रसंचार’चे मुख्य संपादक अनिरुद्ध बडवे आदी मान्यवर उपस्थित राहणार आहेत. याप्रसंगी ज्येष्ठ अभिनेत्री ज्योती चांदेकर यांना जीवनगौरव पुरस्कार प्रदान केला जाणार आहे.
महोत्सवादरम्यान एकपात्री जादूचे प्रयोग, स्व. लतादीदी आणि स्व. बप्पी लहरी यांच्या गीतांची संगीतरजनी, संतवाणी महिलांसाठी खास लावणी महोत्सव, रंगभूमी आणि रंगमंदिर या विषयावर परिसंवाद, फिटे अंधाराचे जाळे हा सुगम संगीताचा कार्यक्रम, अभिनेते माधव अभ्यंकर यांच्या हस्ते इयत्ता १० आणि १२ वी उत्तीर्ण झालेल्या कलाकारांच्या पाल्यांचा सत्कार होणार आहे. तसेच महाराष्ट्राची लोकधारा, महाराष्ट्राची पारंपरिक लावणी, हास्यनगरी, बिग बॉस, यशस्वी मराठी चित्रपटांची यशोगाथा, महाराष्ट्रातील लोक गायकांचा तुफानी जल्लोष हा कार्यक्रम, नितीन बानगुडे पाटील यांचे व्याख्यान आयोजित करण्यात आले आहे. या सादरीकरणादरम्यान त्या त्या कला विभागातील सर्व कलाकारांना बालगंधर्व पुरस्काराने गौरविण्यात येणार आहे.
बालगंधर्व रंगमंदिर ५४ वा वर्धापनदिन सोहळा मोठ्या उत्साहात संपन्न होणार आहे. या महोत्सवानिमित्त तीनदिवसीय सांस्कृतिक कार्यक्रमांचे आयोजन करण्यात आले आहे. या सर्व कार्यक्रमांचे माध्यम प्रायोजकत्व पुणे शहरासह जिल्ह्यात अल्पावधीत लोकप्रिय झालेले दै. ‘राष्ट्रसंचार ’ या वृत्तपत्राने स्वीकारले आहे.
दरम्यान, लेखक, दिग्दर्शक प्रवीण तरडे, अभिनेता प्रसाद ओक, अभिनेता आदिनाथ कोठारे, अभिनेत्री अमृता खानविलकर, दिग्दर्शक दिग्पाल लांजेकर, अभिनेता अजय पूरकर, मंगेश देसाई यांच्या मुलाखती राजेश दामले घेणार आहेत. तर अभिनेते स्वप्नील जोशी, अभिनेते मकरंद अनासपुरे, अभिनेत्री गार्गी फुले यांच्याशी सौमित्र पोटे संवाद साधणार आहेत.
तसेच मराठी बिग बॉसच्या गमती जमती या कार्यक्रमात सुरेखा पुणेकर, तृप्ती देसाई, मीरा जगन्नाथ, डॉ. उत्कर्ष शिंदे, सुरेखा कुडची, अक्षय वाघमारे, गायत्री दातार आदी कलाकार सहभागी होणार आहेत, असेही मेघराज राजेभोसले यांनी सांगितले.
पुरस्कारांचे मानकरी-
जीवनगौरव पुरस्कार ज्येष्ठ अभिनेत्री ज्योती चांदेकर, संगीत नाटक अभिनय राम साठे, नाटक विभाग अभिनय – आशुतोष नेर्लेकर, अंजली जाखडे, लेखन विभाग (नाट्य) योगेश सोमण, दिग्दर्शन विभाग (नाट्य) डॉ. संजीवकुमार पाटील, एकपात्री कलाकार विभाग – स्वाती सुरंगळीकर, जादूगार विभाग प्रसाद कुलकर्णी, संगीत रजनी विभाग – श्रीकांत खडके, प्रकाश गुप्ते, परविंदर सिंग चौहान, अश्विनी कुरपे, चेतन खापरे, लावणी विभाग- सागर वुपारगुडे, बालाजी जाधव, विजय उल्पे, अप्सरा जळगावकर, सोनाली जळगावकर, स्वाती शिंदे, ज्येष्ठ लावणी तमाशा कलावंत – कामिनीबाई पुणेकर (दगडाबाई), मीनाबाई दादू गायकवाड, बबनराव रामचंद्र म्हस्के, लोकसंगीत / लोकगायक अमर पुणेकर, बालनाट्य विभाग आसावरी तारे, ध्वनी संयोजन मेहबूबभाई पठाण, निरंजन सपकाळ, प्रकाशयोजना नीलेश गायकवाड, विजय चेंनुर, नेपथ्य विभाग रामदास गोळेकर, बुकिंग क्लार्क अक्षय जगताप, उद्यान विभाग सुहास खोजे, सुरक्षा विभाग हेमंत बालगुडे, लोकधारा विभाग हर्षद गनबोटे, रमेश गवळी, रशीद पुणेकर, संतोष अवचिते, स्नेहल माझिरे, संजय मगर, सतीश वायदंडे आदींना सन्मानित करण्यात येणार आहे.