मुंबई | मराठी मनोरंजन विश्वात सध्या अनेक वेगवेगळे प्रयोग होताना दिसत आहेत. या हटके प्रयोगांमुळेच मराठी चित्रपटांकडे प्रेक्षकवर्ग देखील वळू लागला आहे. गेल्या अनेक दिवसांपासून वेगवेगळ्या जॉनरचे मराठी चित्रपट प्रेक्षकांच्या भेटीस आलेले आपण पाहिले. प्रेक्षकांनी या सगळ्या चित्रपटांना चांगला प्रतिसादही दिला. आता रोमॅंटिक सिनेमांचे बादशहा संजय जाधव त्यांच्या उत्कृष्ट कलाकारांच्या टीमसह पहिल्यांदाच हॉरर कॉमेडी जॉनरचा चित्रपट प्रेक्षकांच्या भेटीला घेऊन येत आहेत. 26 फेब्रुवारी रोजी मुंबईत आजीवासन स्टुडिओमध्ये या चित्रपटाचा मुहूर्त सोहळा संपन्न झाला. यावेळी मराठी चित्रपटसृष्टीतील प्रसिद्ध गायक अवधूत गुप्ते प्रमुख पाहुणे म्हणून उपस्थित होते. त्याचबरोबर चित्रपटातील कलाकारांसोबत इतर टीमनं देखील मुहूर्त सोहळ्यास उपस्थिती दर्शवली होती. चित्रपटाच्या मुहूर्त सोहळ्या दिवशीच प्रसिद्ध गायक आदर्श शिंदे यांच्या आवाजात चित्रपटातील पहिले गाणे देखील रेकॉर्ड करण्यात आले.
प्रसिद्ध दिग्दर्शक संजय जाधव हे या चित्रपटाची निर्मिती आणि दिग्दर्शन करणार आहेत. तब्बल 4 वर्षांनी संजय जाधव यांचा चित्रपट मोठ्या पडद्यावर झळकणार आहे. या चित्रपटात अमृता खानविलकर, संजय नार्वेकर, तेजस्विनी लोणारी, हरिष दुधाणे हे मुख्य भूमिकेत दिसणार आहेत तर ओंकार भोजने, दीप्ती धोत्रे, अभिजित चव्हाण, संजय शेजवळ आणि युट्यूबर नील साळेकरही यात महत्त्वाच्या भूमिकेत दिसणार आहेत.
के.एफ. फिल्म्स लिमिटेड ,ताहेर सिने टेक्निक्स, अमेय खोपकर एंटरटेन्मेंट आणि स्वाती खोपकर प्रस्तुत ‘कलावती’ चित्रपटाच्या निर्मितीची जबाबदारी प्रजय कामत यांनी उचलली आहे. तर सह-निर्माते म्हणून निनाद नंदकुमार बत्तिन, तबरेज पटेल, परीन मेहता, निश्चय मेहता, नवीन कोहली काम सांभाळणार आहेत. चित्रपटाचे कार्यकारी निर्माता म्हणून वैशाली तुथिका आणि सावित्री धामी काम पाहतील. दिग्दर्शनाची जबाबदारी उचलण्यासोबतच संजय जाधव हे ‘कलावती’ चित्रपटाचे ‘डीओपी’ म्हणूनही काम पाहणार आहेत. पंकज पडघन हे चित्रपटाचे संगीतकार असणार आहेत. मराठीतील प्रसिद्ध लेखक अभिजित गुरुनं चित्रपटाची पटकथा लिहिली आहे, तर चित्रपटाची कथा निशांत भुसे आणि अनुजा कर्णिक यांची आहे. अजूनतरी या चित्रपटाच्या प्रदर्शनाबद्दल काहीही माहिती समोर आलेली नाही. हा चित्रपट यावर्षी प्रदर्शित होण्याची शक्यता आहे.