मुंबई | Katrina Kaif And Vicky Kaushal Life Threats – बाॅलिवूड अभिनेत्री कतरिना कैफ आणि तिचा पती आणि अभिनेता विकी कौशलला जीवे मारण्याची धमकी देण्यात आली आहे. या प्रकरणामध्ये मुंबईमधील सांताक्रूझ पोलीस स्थानकामध्ये अज्ञात व्यक्तीविरोधात गुन्हा दाखल करण्यात आला आहे. कतरीना कैफ आणि विकी कौशलला सोशल मीडियाच्या माध्यमातून जीवे मारण्याची धमकी देण्यात आली आहे. त्यानंतर सांताक्रूझ पोलीस स्थानकामध्ये गुन्ह्याची नोंद केल्याची माहिती पोलिसांनी दिली आहे.
कतरिना आणि विकी हे मालदीवला सुट्ट्यांसाठी गेले होते. कतरिनाच्या वाढदिवसानिमित्त ते दोघे जवळच्या मित्रपरिवारासोबत मालदीवला गेले होते. त्यांनी त्यांचे अनेक फोटो देखील सोशल मीडियावरुन शेअर केले होते. मात्र आता त्या दोघांना धमकी आल्याने बाॅलिवूडमध्ये एकच खळबळ उडाली आहे. तसंच कतरिना आणि विकीला नेमकी काय धमकी देण्यात आली आहे यासंदर्भातील माहिती सध्या उपलब्ध नसली तरी या प्रकरणामध्ये गुन्ह्याची नोंद करुन घेण्यात आल्याचं एएनआय या वृत्तसंस्थेनं म्हटलं आहे.
दरम्यान, काही आठवड्यांपूर्वीच अभिनेता सलमान खान आणि त्याचे वडील सलिम खान यांना जीवे मारण्याची धमकी देण्यात आली होती. पंजाबी गायक सिद्धू मुसेवाला प्रमाणे तुम्हालाही मारुन टाकू अशी धमकी सलमान आणि त्याच्या वडिलांना एका पत्राच्या माध्यमातून देण्यात आली होती. यानंतर सलमान आणि त्याच्या कुटुंबियांच्या सुरक्षेमध्ये वाढ करण्यात आली आहे. तपासानुसार बिश्नोई टोळीकडून बॉलिवूड कलाकारांकडून खंडीणी गोळा करण्याच्या उद्देशाने या धमक्या दिल्या जात असल्याची माहिती समोर आली आहे.