मुंबई | झी मराठी ही अशी वाहिनी आहे जी नेहेमीच वेगवेगळे विषय हाताळत आली आहे. असाच एक वेगळा विषय घेऊन सुरु झालेली मालिका म्हणजे ‘अप्पी आमची कलेक्टर’. मराठी मनोरंजन विश्वातील या लोकप्रिय मालिकेला प्रेक्षकांकडून चांगला प्रतिसाद मिळतो आहे. दरम्यान, लवकरच या मालिकेत दोन दिग्गजांची एन्ट्री होणार आहे. मात्र आश्चर्यकारक बाब म्हणजे हे दोन्ही दिग्गज मालिका विश्वातील नाहीयेत. ज्येष्ठ विशेष सरकारी वकील उज्वल निकम आणि लेखक-कादंबरीकार विश्वास पाटील हे या मालिकेत एन्ट्री घेणार आहेत.
‘अप्पी आमची कलेक्टर’ या मालिकेतील अपर्णा सुरेश माने अर्थात अप्पी या ग्रामीण भागातील मुलीची स्वप्न खूप मोठी असतात. ज्या गावात धड शैक्षणिक सुविधा उपलब्ध नाहीत, जिथे तिला कोणतेच मार्गदर्शन मिळत नाही अशा ठिकाणाहून येत ती आयुष्यात प्रगती करते. अप्पीचं ध्येय खुप मोठ्ठं आहे आणि त्यामुळे ती येणाऱ्या आर्थिक, शैक्षणिक आणि सामाजिक अडचणींवर मात करुन ती कलेक्टर होते, अशी ही संघर्ष कथा आहे.
दरम्यान या मालिकेत अप्पीने नुकतीच UPSC ची परीक्षा पहिल्या नंबरने पास केली आहे आणि आता तिचं कलेक्टर बनण्याचं स्वप्न दृष्टीपथात येणार आहे. यावेळी अप्पीला कलेक्टर होण्यासाठी आणखी एका परीक्षेमधून जावं लागणार आहे, ही महत्त्वाची परीक्षा म्हणजे तिला इंटरव्ह्यू. अप्पीची ही मुलाखत ज्येष्ठ विशेष सरकारी वकील ‘उज्वल निकम’ आणि कादंबरीकार ‘विश्वास पाटील’ घेतील. या निमित्ताने हे दोन ऑफिसर्स टेलिव्हिजनवर प्रथमच मालिकेत खरीखुरी भूमिका साकारताना दिसणार आहेत.