आमदार महेश लांडगे यांच्या सूचना
पिंपरी : पिंपरी-चिंचवड शहरातील विकासकामे मार्गी लावण्यासाठी अधिकाऱ्यांनी चालढकल करू नये. प्रशासक काळात रखडलेली कामे तत्काळ मार्गी लावावीत. तसेच, तांत्रिक कारण सांगून लोकांना वेठीस धरू नये. तसेच आंद्रा, भामा-आसखेड प्रकल्पाचे पाणी शहराला मिळण्याबाबत प्रशासनाची सुरू असलेली चालढकल खपवून घेतली जाणार नाही, अशा शब्दांत भाजपचे शहराध्यक्ष आमदार महेश लांडगे यांनी महापालिका अधिकाऱ्यांना खडसावले.
शहरातील रस्ते, पाणी आणि कचऱ्यासह विविध प्रकल्पांची कामे निर्धारित वेळेत पूर्ण झाली पाहिजेत. यासाठी भाजप शहराध्यक्ष महेश लांडगे यांनी ऑटो क्लस्टर येथे संबंधित विभागांच्या अधिकाऱ्यांची बैठक घेतली. या वेळी अतिरिक्त आयुक्त विकास ढाकणे, जितेंद्र वाघ, उल्हास जगताप, सहशहर अभियंता मकरंद निकम, संजय कुलकर्णी, श्रीकांत सवणे आदी उपस्थित होते. आंद्रा, भामा आसखेड प्रकल्पाचे पाणी सप्टेंबरअखेर पिंपरी-चिंचवडला मिळेल, असा दुजोरा महापालिका अधिकाऱ्यांनी दिला. तसेच, देहुरोड कॅन्टोन्मेंट बोर्डाचा कचरा मोशी कचरा डेपो येथे टाकण्यात येणार आहे. त्याला स्थानिकांसह लोकप्रतिनिधींनी विरोध केला आहे. तेथील रहिवाशांशी चर्चा करून जोपर्यंत कॅन्टोन्मेंटचा प्रकल्प तयार होत नाही, तोपर्यंत कचरा टाकण्याबाबत विनंती करावी. त्यासाठी कॅन्टोन्मेंटचे मुख्याधिकाऱ्यांसोबत बैठक बोलवावी, अशी सूचना आमदार लांडगे यांनी केली.
उत्सवासाठी एक खिडकी सुविधा
कोरोना महामारीमुळे दोन वर्षे सण- उत्सव साजरे करता आले नाही. या वर्षी दहीहंडी आणि गणेशोत्सव सार्वजनिकपणे साजरा होत आहे. त्यामुळे मंडळांसाठी ना- हरकत परवाना देण्यासाठी सुलभ प्रक्रिया ठेवावी. त्यासाठी एक खिडकी सुविधा उपलब्ध करुन द्यावी. पर्यावरणपूरक गणेशोत्सव साजरा करण्यावर भर द्यावा. सोसायट्यांमध्ये अनेक ठिकाणी एसटीपी प्रकल्प बंद अवस्थेत आहेत. याबाबत बिल्डरवर दंडात्मक कारवाई करावी. एसटीपी जनरेटर, कचरा प्लॅण्ट, सोलर सिस्टीम दर्जेदार यंत्रणा बसवण्यासाठी बांधकाम व्यावसायिकांना सूचना द्याव्यात. सोसायटीतील कचरा उचलण्यासंदर्भात आदेश द्यावा. सोसायटीधारकांसाठी १०० टक्के पार्किंग उपलब्ध व्हावी.
स्पाईन रोड, त्रिवेणीनगर येथील रस्त्याचे काम पूर्ण करण्यासाठी बाधित नागरिकांचे पुनर्वसन प्रक्रिया अत्यंत जलदगतीने होण्यासाठी कमीत कमी जागा मालकीचे पुरावे घेऊन त्यांना तातडीने जागा उपलब्ध करून द्यावी. त्रिवेणीनगर ते तळवडे मुख्य रस्ता २४ मीटर असून, काही ठिकाणी २४ मीटर रस्त्याचे भूसंपादन होत नसल्याने रस्ता रुंदीकरणात अडचणी येत आहेत. त्यामुळे तातडीने कार्यवाही करावी, अशी सूचना आमदार लांडगे यांनी केली.
शहरातील गोवंश संवर्धन आणि उपचार केंद्राबाबत प्रशासनाकडे मागणी करण्यात आली आहे. त्यासाठी चिखली ते चऱ्होली दरम्यान ब्ल्यू लाइनमध्ये महापालिकेच्या ताब्यात आलेल्या आरक्षणामध्ये गोशाळा विकसित करता येईल का, याबाबत पडताळणी करावी. भोसरीतील थोरल्या पादुका चौकातील संतशिल्प व म्युरलचे काम लवकरात लवकर पूर्ण करावे. भोसरीत लहान मुलांचे रुग्णालय आणि ओपीडी संदर्भातील नियोजन तत्काळ करावे आदी सूचना आमदार लांडगे यांनी बैठकीत केल्या. भोसरीतील कुस्ती संकुल आणि कबड्डी संकुलामधील खेळाडूंची राहण्याची सोय व्हावी, याकरिता १२० क्षमतेच्या वसतिगृहाचे काम लवकरात लवकर सुरू करावे. स्टॉर्म वॉटर लाइनची अपूर्ण कामे पूर्ण करावीत, आदी सूचनाही आमदार लांडगे यांनी या वेळी दिल्या.