मुंबई | Ameya Khopkar – ‘आदिपुरूष’ (Adipurush) या चित्रपटाचा टीझर काही दिवसांपूर्वीच प्रदर्शित झाला आहे. टीझर प्रदर्शित झाल्यानंतर अनेकांनी या चित्रपटाला ट्रोल केलं आहे. चित्रपटातील व्हीएफक्स आणि सैफ अली खाननं (Saif Ali Khan) साकारलेल्या ‘रावणा’च्या भूमिकेवर अनेकांनी आक्षेप घेतला आहे. तसंच भाजप आमदार राम कदम (Ram Kadam) यांनी देखील हा चित्रपट महाराष्ट्रात प्रदर्शित होऊ देणार नाही असा इशारा दिला आहे. यादरम्यान मनसेनं (MNS) मात्र या चित्रपटाला जाहीरपणे पाठिंबा दिला आहे.
मनसेचे चित्रपट सेनेचे अध्यक्ष अमेय खोपकर (Ameya Khopkar) यांनी ट्विट करत महाराष्ट्र नवनिर्माण चित्रपट कर्मचारी सेनेचा ‘आदिपुरूष’ चित्रपटाला पूर्ण पाठिंबा असल्याचं स्पष्ट केलं आहे. अमेय खोपकर यांनी ट्विट करत म्हटलं आहे की, “ओम राऊत या दिग्दर्शकानं यापूर्वी लोकमान्य आणि तान्हाजी या कलाकृतींमधून इतिहासाची अभ्यासपूर्ण मांडणी केलेली आहे. स्वातंत्र्यवीर सावरकर स्मारकात ओम राऊत यांनी साकारलेला भव्य लाईट अँड साऊंड शो आजही दिमाखात सुरू आहे.”
“ओम राऊत याच्या आगामी ‘आदिपुरूष’ टीझरवरून टीका होणं हे दुर्दैवी आहे. ओम राऊत आणि सहकाऱ्यांच्या प्रामाणिक प्रयत्नांची प्रचिती चित्रपट प्रदर्शित झाल्यावर येईल अशी आम्हाला खात्री आहे. म्हणूनच महाराष्ट्र नवनिर्माण चित्रपट कर्मचारी सेनेचा ‘आदिपुरूष’ निर्मितीला पूर्ण पाठिंबा आहे”, असंही अमेय खोपकर यांनी ट्विट करत म्हटलं आहे.
पुढे ते म्हणाले, “मनसे ओम राऊत यांच्या पाठिशी खंबीरपणे उभी राहणार आहे. मी त्यांना चांगला ओळखतो. ते अत्यंत हिंदुत्ववादी आहे. त्यांच्याकडून कोणतीही चूक होणार नाही. राम कदम किंवा आपल्याला हिंदुत्ववादी म्हणवून घेणारे इतर नेते 95 सेकंदांच्या टीझरवरून सिनेमा कसा असेल याचा कसा काय अंदाज लावू शकतात. लोकांना याचा निर्णय घेऊ द्या”, असं अमेय खोपकर ‘एबीपी माझा’शी बोलताना म्हणाले.
“चित्रपट प्रदर्शित होऊ द्या, आणि त्यात खरंच देवी-देवतांचा अपमान झाला असेल, तर तेव्हा विरोध करु शकतो. ते तुम्हाला चित्रपट पाहा असं सांगत आहेत. पण आत्तापासूनच एका हिंदू आणि मराठी दिग्दर्शकाचं तुम्ही खच्चीकरण करत आहात. ही योग्य पद्धत नव्हे. त्याचं खच्चीकरण करु नका,” असं आवाहन देखील अमेय खोपकर यांनी केलं आहे.