“राज्यातील जनतेच्या हिताचे सरकार संजय राऊतांमुळेच आले”

मुंबई | Navneet Rana On Sanjay Raut – अमरावतीच्या खासदार नवनीत राणा यांनी शिवसेनेचे खासदार संजय राऊत यांच्यावर निशाणा साधला आहे. राज्यातील जनतेच्या हिताचे सरकार हे संजय राऊत यांच्यामुळेच आले असल्याची खोचक टीका नवनीत राणा यांनी केली आहे. तसंच राऊतांमुळेच उद्धव ठाकरे घरी बसले असून त्यांचे अभिनंदन करायला पाहिजे, असंही त्या म्हणाल्या.

”आपण सर्वांनीच संजय राऊत यांचे अभिनंदन केले पाहिजे. मी सुद्धा त्यांचे अभिनंदन करते. त्यांच्यामुळेच राज्यात जनतेच्या हिताचे सरकार आले आहे. आता कुठे महाराष्ट्राला खऱ्या अर्थाने न्याय मिळाला आहे. उद्धव ठाकरेंना घरी बसवण्याचे काम संजय राऊतांनी केलं आहे”, असा खोचक टोला नवनीत राणा यांनी लगावला आहे.

दरम्यान, काही दिवसांपूर्वीच उद्धव ठाकरे यांनी हनुमान चालीसा पठण करावे, अशी मागणी राणा दाम्पत्यानं केली होती. तसंच मुंबईत उद्धव ठाकरे यांच्या मातोश्री निवासस्थानी जाऊन हनुमान चालिसा पठण करण्याची घोषणाही त्यांनी केली होती. मात्र, राणा दाम्पत्य मुंबईत पोहोचताच त्यांच्यावर कारवाई करण्यात आली. त्यावेळी दोघेही १४ दिवस न्यायालयीन कोठडीत होते.