कोल्हापूर | Nitesh Rane – भाजप आमदार नितेश राणे (Nitesh Rane) लव्ह जिहादविरोधात आक्रमक झाले आहेत. “चुलीत जाऊ द्या आमदारकी, डब्यात जाऊ द्या ती खासदारकी, कोण मोजत नाही. मी मरताना ते आमदार पद लागणार नाहीये. मी मरताना एक हिंदू मेला असं ते लोक सांगणार आहेत”, असं नितेश राणे यांनी म्हटलं आहे. आज (2 नोव्हेंबर) लव्ह जिहादविरोधात हिंदू जनआक्रोश मोर्चा काढण्यात आला. यावेळी राणे बोलत होते.
यावेळी नितेश राणे म्हणाले, “मुस्लिमांना आंदोलन करण्याची वेळ आली अशी एक घटना दाखवा. त्यांच्या कोणत्याही व्यक्तीकडे किंवा धर्माकडे वाकड्या नजरेनं पाहिलं तर ते त्याला जीवंत ठेवत नाही. अशी असंख्य उदाहरणं मी तुम्हाला देऊ शकतो. मात्र, आपल्याला टोप्या घालाव्या लागतात, गमछे घालावे लागतात, घोषणा द्याव्या लागतात. आपल्याला किरण पावसकर, नितेश राणे लागतात, मगच आपण काहीतरी करतो. हीच आपली शोकांतिका आहे.”
“आम्ही भाषणं देण्यासाठी इथं जमलेलो नाही. चुलीत जाऊ द्या आमदारकी, डब्यात जाऊ द्या ती खासदारकी, कोण मोजत नाही. मी मरताना ते आमदार पद लागणार नाहीये. मी मरताना एक हिंदू मेला असं ते लोक सांगणार आहेत. हिंदू म्हणून तुम्ही कसं जगणार आहात, हिंदू म्हणून आपल्या धर्मांचं कसं रक्षण करणार आहात हे आज ठरवण्याची गरज आहे”, असंही नितेश राणे म्हणाले.
पुढे ते म्हणाले, “नगरमध्ये एका हिंदू मुलानं एका मुस्लीम तरूणीशी लग्न केलं. त्यानंतर तिकडच्या सर्व मुस्लिमांनी एकत्र येऊन त्या मुलाला ठेचून काढलं. कारण तो मुलगा हिंदू होता. ते लोक धरणं देत बसली नाहीत, टोप्या घालत घोषणा देत बसली नाहीत. घरात माता-भगिणी सुरक्षित नसतील तर तुम्हाला जय श्रीराम म्हणण्याचा आणि भगवा गमछा घालण्याचा काय अधिकार आहे?”, असा सवालही नितेश राणेंनी विचारला आहे.