नागपूर : (Nitin Gadkari On state Formers) राज्यातील शेतकऱ्यांनी शेत पंपाच्या विजेसाठी सरकारवर, वीज मंडळावर विसंबून राहू नका. कारण, सरकार आणि परमेश्वर यांचे केव्हा आशीर्वाद मिळतील आणि केव्हा गायब होतील, याचा काही भरवसा नाही, असे वक्तव्य केंद्रीय वाहतूक मंत्री नितीन गडकरी यांनी केले. तेव्हा सोलर पंप लावून सकाळी ८ ते सायंकाळी ६ वाजेपर्यंत शेतीला पाणी देण्याची खात्रीशीर व्यवस्था करावी. त्यासाठी विविध योजनेतून सोलर पंप बसवून घेतले पाहिजे. त्याशिवाय काही पर्याय नाही.
गडकरी म्हणाले, शेतीचे सिंचन करण्यासाठी आवश्यक वीज उपलब्ध नाही. गावाकडे गेल्यानंतर हा प्रश्न प्रकर्षाने जाणवला. शेत पंपाला दिवसभर वीज मिळत नाही. ही समस्या सोडवण्यासाठी सगळ्यांनी रूफ टॉप सोलर बसवून घ्यावे. सरकार आणि परमेश्वर या दोघांचा केव्हा आशीर्वाद मिळेल आणि केव्हा गायब होईल यांचा काही भरवसा नाही. विदर्भ शेतकरी उत्पादक कंपन्यांची कार्यशाळा नागपुरातील वनामतीच्या सभागृहात मंगळवारी आयोजित करण्यात आली होती, याप्रसंगी ते बोलत होते.
ते म्हणाले, आपल्याला दोन सवयी जडलेल्या आहेत. पहिली म्हणजे बिगर भरतीची. काहीतरी करून कोणाच्यातरी माथी मारण्याची सवय आणि दुसरी सवय म्हणजे फसवणूक करून अनुदान मिळवण्याची होय. चोरीचकाट्या करा आणि सरकारचे अनुदान मिळवा, अशा गोष्टी करणारे आयुष्यात मोठे होऊ शकत नाही असे गडकरी म्हणाले.