बीड | Raj Thackeray – मनसे अध्यक्ष राज ठाकरे (Raj Thackeray) यांच्याविरोधात अजामीनपात्र वॉरंट जारी करण्यात आलं आहे. राज ठाकरेंना (Raj Thackeray) न्यायालयानं परळीतील एका प्रकरणात अजामीनपात्र वॉरंट बजावलं होतं. त्यामुळे आज (18 जानेवारी) राज ठाकरे परळी न्यायालयात हजर राहणार आहेत.
राज ठाकरेंना (Raj Thackeray) 2008 साली ऑक्टोंबर महिन्यात मुंबईत अटक करण्यात आली होती. राज्यभर त्याचे पडसाद उमटले होते. तसंच परळीतील धर्मापुरी पॉईंटवर एसटीवर दगडफेक करण्यात आली होती. त्यामुळे मोठ्या प्रमाणात नुकसान झालं होतं. या घटनेनंतर जमावबंदी आदेशाचं उल्लंघन, सार्वजनिक मालमत्तेचं नुकसान आणि चिथावणीखोर वक्तव्य प्रकरणी राज ठाकरे यांच्यासह मनसेच्या अनेक कार्यकर्त्यांवर गुन्हे दाखल झाले होते.
या प्रकरणी परळी पोलीस ठाण्यातही गुन्हा दाखल झाला होता. तसंच या प्रकरणात तपास पूर्ण करून न्यायालयात आरोपपत्र दाखल केल्यानंतर राज ठाकरे आणि कार्यकर्त्यांना जामीन मंजूर झाला आहे. मात्र, राज ठाकरे न्यायालयात गैरहजर राहिल्यानं त्यांच्याविरुद्ध 6 जानेवारी 2022 ला अजामीनपात्र वॉरंट काढत, 10 फेब्रुवारी 2022 पर्यंत कोर्टात हजर राहण्याचे आदेश दिले होते.
याच प्रकरणातील मनसेच्या पाच पदाधिकाऱ्यांनी न्यायालयात हजर राहत अजामीनपात्र वॉरंट रद्द केलं होतं. मात्र, 13 एप्रिल 2022 ला दुसऱ्यांदा अजामीनपात्र वॉरंट काढण्यात आलं होतं. त्यामुळे 12 जानेवारी 2023 ला हजर राहण्यास सांगितलं होतं. तर आज राज ठाकरे न्यायालयात हजर राहणार आहेत.