मुंबई | पंतप्रधान नरेंद्र मोदी (Narendra Modi) यांच्या हस्ते मुंबई मेट्रोच्या मेट्रो टू ए (Mumbai Metro 2A) आणि मेट्रो सेव्हन (Mumbai Metro 7) या मार्गाचं लोकार्पण करण्यात येणार आहे. त्यावेळी पंतप्रधान मेट्रोतून प्रवासही करण्याची शक्यता आहे. त्यामुळं त्यांच्या सुरक्षिततेची खबरदारी म्हणून मेट्रो वनची सेवा 19 जानेवारी रोजी संध्याकाळी पावणेदोन तास मेट्रो वनची (Metro One) सेवा बंद राहणार आहे. त्या दिवशी संध्याकाळी 5.45 ते 7.30 वाजेपर्यंत मेट्रो सेवा बंद (Metro Service Closed) असणार आहेत.
अंधेरी पूर्व परिसरात अनेक कार्यालयं आहेत. संध्याकाळी ज्या वेळेत मेट्रो सेवा बंद असणार आहे, त्याच वेळेत अनेक कार्यालय सुटतात. त्यामुळे अनेक लोक घरी परतण्यासाठी किंवा लोकलच स्टेशन गाठण्यासाठी मेट्रोवर अवलंबून आहेत. त्यामुळे ऐन गर्दीच्या वेळी मेट्रो बंद ठेवण्यात येणार असल्यानं घरी जाणाऱ्या प्रवाशांची मोठी गैरसोय होणार आहे. काही ऑपरेशनल आणि प्रशासकीय कारणास्तव मेट्रो बंद करण्यात येणार असल्याचं मुंबई मेट्रो प्रशासनाच्या वतीनं सांगितलं आहे. त्यामुळे मेट्रोनं प्रवास करणाऱ्या प्रवाशांनी यावेळी त्यांच्या प्रवासाचं नियोजन करावं असं आवाहनही मेट्रोकडून करण्यात आलं आहे.