मुंबई : काही दिवसांपूर्वी पुण्यातील एका तरुणीने शिवसेना नेते रघुनाथ कुचिक यांच्यावर लैंगिक अत्याचार आणि गर्भपात केल्याचा आरोप केला होता. त्यामुळे गेल्या काही दिवसांपासून राजकारण चांगलंच तापलं होतं. तसंच तरुणीने केलेल्या तक्रारीनंतर पुण्यातील शिवाजीनगर पोलिस स्टेशनमध्ये कुचिक यांच्याविरोधात गुन्हा दाखल करण्यात आला होता. या प्रकरणी रघुनाथ कुचिक यांना जामीन मिळाला. मात्र रघुनाथ कुचिक यांनी अटी आणि शर्तीचा भंग केला आहे, असा आरोप भाजपाच्या नेत्या चित्रा वाघ यांनी केला होता. त्यामुळे कुचिक यांचा जामीन रद्द केला जावा अशी मागणी पुणे पोलिसांकडे केली होती. त्याबाबत अखेर सोमवारी चित्रा वाघ यांचा शिवाजीनगर पोलिसांनी जबाब घेतला. त्यानंतर प्रसार माध्यमांशी संवाद साधताना त्यांनी म्हटलं की, माझ्याकडील सर्व पुरावे मी पोलिसांना दिले आहेत. मला विश्वास आहे की, येणार्‍या दिवसांमध्ये १०० टक्के कुचिक यांचा जामीन रद्द होईल.
“१२ एप्रिल रोजी माझ्यावर खोटे बिनबुडाचे आरोप करण्यात आले. यानंतर पीडितेने केलेला खुलासा मी पोलिसांकडे दिला आहे. त्यानंतर पोलीस आयुक्तांना पत्र लिहून मी मागणी केली होती की, ज्या अटी शर्तींवर रघुनाथ कुचिक यांना जामीन मिळाला आहे तो रद्द व्हावा. त्यांनी अटी शर्तींचा भंग केला आहे. पोलिसांनी त्याची चौकशी करुन जामीन रद्द होण्यासाठी प्रयत्न करायला हवे. त्या अर्जावरील सविस्तर जबाब शिवाजीनगर पोलिसांनी घेतला आहे, माझ्याकडे जे पुरावे होते ते मी पोलिसांना दिले आहेत. मला विश्वास आहे की येणाऱ्या दिवसांमध्ये रघुनाथ कुचिक यांचा जामीन रद्द होईल, असं चित्रा वाघ यांनी म्हटलं आहे.