“…मग तुम्ही फडणवीसांच्या गळ्यात मंगळसूत्र बांधा,” राऊतांचा विखे पाटलांना खोचक टोला

अहमदनगर : (Sanjay Raut on Radhakrishna Vikhe Patil) राज्याचे महसूल मंत्री राधाकृष्ण विखे पाटील (Radhakrishna Vikhe Patil) यांनी देवेंद्र फडणवीस (Devendra Fadnavis) आमच्या मनातील मुख्यमंत्री असल्याचं विधान केल्याने राजकीय वर्तुळात पुन्हा एकदा चर्चा रंगली आहे. राज्यात शिंदे-फडणवीस युतीचं सरकार असलं तरी भाजप नेत्यांकडून वारंवार देवेंद्र फडणवीसच आमचे मुख्यमंत्री असल्याचं विधान केलं जात आहे.

यामुळे एकनाथ शिंदे (Eknath Shinde) यांना आगामी काळात मुख्यमंत्री केलं जाईल का? अशी शंकाही व्यक्त होत आहे. याचं कारण म्हणजे देवेंद्र फडणवीस हेदेखील उपमुख्यमंत्री होण्यास इच्छुक नव्हते. जाहीर कार्यक्रमात त्यांनी याची कबुलीही दिली आहे. दरम्यान राधाकृष्ण विखे पाटील यांच्या विधानावर संजय राऊत (Sanjay Raut) यांनी टीका केली आहे. त्यांनी देवेंद्र फडणवीसांच्या नावाचं मंगळसूत्र बांधावं असा टोला त्यांनी लगावला आहे.

संजय राऊत सध्या जळगावात असून यावेळी पत्रकार परिषदेत त्यांनी राज्य सरकारवर ताशेरे ओढले. दरम्यान राधाकृष्ण विखे पाटील यांच्या विधानाबद्दल विचारण्यात आलं असता ते म्हणाले की “मुख्यंत्रीपदावर त्यांना बसवा, कोणी थांबवलं आहे तुम्हाला…जर तुमच्या मनात कोणी वेगळं असेल आणि दुसऱ्यासोबत नांदत असाल तर हा व्यभिचार आहे. लग्न एकाशी, वरलं एकाला आणि संसार एकाशी यासारखा व्यभिचार नाही. राधाकृष्ण विखे पाटील यांनी त्यांच्या (देवेंद्र फडणवीस) गळ्यात जाऊन मंगळसूत्र बांधावं. आम्ही कुठे थांबवलं आहे, आम्हालाही ते चालतील”.