पुणे | ऑनलाइन फसवणुकीच्या घटनांमध्ये वाढ होत असताना पुण्यातून राष्ट्रवादीचा आमदार सेक्सटॉर्शनच्या जाळ्यात ठरल्याचं समोर आलं आहे. राष्ट्रवादीच्या या आमदाराला व्हिडीओ कॉल करून भुरळ घालण्याचा प्रयत्न केला. सोलापूर जिल्ह्यातील मोहोळचे राष्ट्रवादीचे आमदार यशवंत विठ्ठल माने यांना ब्लॅकमेल करून सायबर चोरट्यांनी त्यांच्याकडून 1 लाख रुपयांची मागणी केली. तसेच खंडणी न दिल्यास सोशल मीडियावर अश्लील व्हिडीओ व्हायरल करण्याची धमकी देण्यात आली.
सायबर चोरट्यांना राजस्थानातून अटक
आपल्याला ब्लॅकमेल करण्यात येत असल्याचं लक्षात आल्यानंतर आमदार माने यांनी पोलिसांकडे या प्रकाराची तक्रार केली. त्यानंतर पुणे सायबर पोलिसांनी या प्रकरणाची कसून तपास केला. पुणे सायबर पोलिसांनी या प्रकरणी आमदार माने यांना सेक्सटॉर्शनच्या जाळ्यात ओढणाऱ्या रिझवान अस्लम खान याला अटक केली. पोलिसांनी त्याला राजस्थानातील भरतपूर येथून अटक केली आहे.
सेक्सटॉर्शन काय असतं ?
केंब्रिज डिक्शनरीच्या मते, सेक्सटॉर्शनचा अर्थ कुणाला काही तरी करण्यास भाग पाडणे. विशेष करून यौनसंबंधी काम करण्यास भाग पाडणे. यात नग्न फोटो व्हायरल करून धमकी देणे, न्यूड व्हिडीओ व्हायरल करण्याची धमकी देणे आदी प्रकारांचा समावेश आहे.
एखाद्या व्यक्तीच्या खासगी आयुष्याबाबतची माहिती लिक करण्याची धमकी देण्याचा हा एक प्रकारचा गुन्हा आहे. पैशासाठी या सर्व गोष्टी केल्या जातात. किंवा सेक्शुअल डिमांड पूर्ण करण्यासाठी या धमक्या दिल्या जातात. साध्या सोप्या भाषेत सांगायचं म्हणजे एखाद्या व्यक्तीचे प्रायव्हेट कंटेट व्हायरल करण्याची धमकी देणे आणि त्याबदल्यात काही तरी मिळवणे म्हणजेच सेक्सटॉर्शन होय.