मुंबई | Supriya Sule Talk About CM Eknath Shinde – झी मराठी वाहिनीवर एक नवीन कार्यक्रम प्रेक्षकांच्या भेटीस येणार आहे. 29 जुलैपासून ‘बस बाई बस’ या नव्या कार्यक्रमाला सुरवात होणार आहे. मात्र हा कार्यक्रम प्रदर्शित होण्यापूर्वीच चर्चेचा विषय ठरत आहे. या कार्यक्रमाच्या पहिल्या भागात पाहुण्या म्हणून खासदार सुप्रिया सुळे यांनी हजेरी लावली आहे. याचाच एक व्हिडीओ सध्या चांगलाच व्हायरल होत आहे.
झी मराठीने त्यांच्या अधिकृत युट्यूबवर एक व्हिडीओ शेअर केला आहे. या व्हिडीओत कार्यक्रमाचे सुत्रसंचालक सुबोध भावेनं सुप्रिया सुळे यांच्यासोबत अनेक गमतीजमती केल्या आहेत. यावेळी सुबोधनं सुप्रिया सुळेंसोबत एक खेळ खेळला. त्यांनं त्यांना काही नेत्यांचे फोटो दाखवले. हे फोटो पाहून सुप्रिया सुळेंनी त्यांच्या भावना बोलून दाखवल्या. या खेळादरम्यान सुप्रिया सुळेंना मुख्यमंत्री एकनाथ शिंदे यांचा फोटो दाखवण्यात आला. त्यावर त्या म्हणाल्या, “नमस्कार कसे आहात. तुम्ही कमी बोलता आणि मी फक्त बोलतच राहते. त्यादिवशी आपली उद्धवजींच्या केबिनमध्ये भेट झाली होती, तेव्हा तुम्ही मला बोलला नाहीत की आपण सुरतला निघणार. आपण किमान तिथे विधानभवनात भेटलो असतो.”
पुढे सुप्रिया सुळे म्हणाल्या, “आता मी घरी खूप चिडवते कारण आता पवार विरुद्ध शिंदे होणार. कारण पवार माझे वडील आणि माझ्या आईचं आडनाव शिंदे. मी परवा दादालाही सांगितलं की, दादा आता किती मजा येणार ना, कारण पवार विरुद्ध शिंदे होणार. बाबा जिंकणार की आई हे काळचं ठरवेल. आपला श्रीकांत मला खूप प्रिय आहे. श्रीकांत खूप गोड मुलगा आहे. मला आनंद वाटतो. परवा भेटला होता दिल्लीत, तुम्ही दिल्लीत आला होता, पण आपली भेटच झाली नाही”.
“श्रीकांतची होते. छान गोड मुलगा आहे. मला खूप प्रिय आहे. सगळीकडे आता पाऊस वैगरे पडतोय. बघा बाबा त्या चिन्हाचं वैगरे काय होतं ते उरकून टाकून जरा कामाला लागूया हो. सव्वा महिना झाला. माझ्या कामाचा इतका खोळंबा झाला आहे, एखाद्या कलेक्टरला किंवा अधिकाऱ्याला फोन केला की अधिकारी म्हणतात, अजून मंत्रीच जागेवर नाहीत. जरा तेवढं बघा. माझी मतदार संघातील फार काम अडकलीत, तेवढं फक्त लवकर करुन घ्या. खूप खूप शुभेच्छा. तुम्ही इतकं कमी बोलता की मला दडपण येतं. मी बोलतंच राहते. आपलं नातं वन वे आहे असंच वाटतं. ओके भेटूया आपण. जय महाराष्ट्र”, असंही सुप्रिया सुळेंनी म्हटलं आहे.