पर्यावरण अहवाल : शहरातील वाहनांचा वाढता वापर कारणीभूत
पिंपरी : पिंपरी-चिंचवड शहरातील वाहनांच्या वाढत्या वापरामुळे हवेतील सल्फर डायॉक्साईडचे प्रमाण वाढले आहे. शहराच्या विविध परिसरातील वायूप्रदूषण तपासणी करण्यात आली आहे. महापालिका परिसरात सल्फर डायॉक्साईड, नायट्रोजन, धुलीकण, कार्बन मोनॉक्साईड हवेतील प्रमाण हे प्रदूषण नियंत्रण मंडळाने निश्चित केलेल्या विहित मर्यादेमध्ये आहे. मात्र पावसाळ्यात पातळी तुलनेने कमी झाल्याचे दिसून येते. शहराच्या विविध भागांमध्ये ध्वनिपातळी ही प्रदूषण मंडळाच्या विहित मर्यादेपेक्षा जास्त असल्याचे पर्यावरण अहवालावरून दिसून येत आहे.
पिंपरी-चिंचवड शहराचा सन २०२१-२२ चा पर्यावरण सद्यःस्थिती अहवाल अतिरिक्त आयुक्त जितेंद्र वाघ आणि पर्यावरण व अभियांत्रिकी विभागाचे सहशहर अभियंता संजय कुलकर्णी यांनी महापालिका प्रशासक राजेश पाटील यांच्याकडे सादर केला. पर्यावरणातील मुख्य घटकांतील बदलांचा अभ्यास करून विश्लेषण करणे, सद्य:स्थितीतील जैवविविधतेची स्थिती अधोरेखित करणे, पर्यावरणातील उपलब्ध संसाधने व त्यांची मागणी यांचे नियोजन करणे, पर्यावरण संरक्षण व संवर्धनाबाबत जनजागृती करणे, नागरिक व लोकप्रतिनिधी यांचा पर्यावरण धोरण विकासात सहभाग वाढविण्यास प्रोत्साहन देणे, पर्यावरणीय आव्हानांचा आढावा घेऊन धोरण निश्चित करणे अशी या अहवालाची वैशिष्ट्ये आहेत.
सन २०२१ च्या तुलनेत सन २०२१-२२ मध्ये वाहनांच्या नोंदणी संख्येमध्ये वाढ झाली आहे. नागरिकांना पुरविण्यात येणाऱ्या पाण्याची गुणवत्ता ही आयएस मानांकनाच्या निर्धारित मर्यादेमध्ये आहे. महापालिका हद्दीतील काही ठिकाणी पाण्याची गुणवत्ता प्रदूषण नियंत्रण मंडळाच्या विहित मर्यादेत नसल्याचे नदी, तलाव, भूजल नमुने तपासणी अहवालातून दिसून येते. पर्यावरणसंतुलन राखण्यासाठी नागरी सहभाग आवश्यक असून शहराचे आरोग्य उत्तम ठेवण्यासाठी सर्वांच्या योगदानाची आवश्यकता असल्याचे अहवालात नमूद करण्यात आले आहे.
महापालिकेतील विविध विभाग, महाराष्ट्र प्रदूषण नियंत्रण मंडळ, विविध शासकीय निमशासकीय कार्यालये आदींकडून प्राप्त झालेल्या पर्यावरणविषयक माहिती, तसेच स्कायलॅब या संस्थेने महापालिका क्षेत्रातील विविध ठिकाणी केलेल्या वायू, ध्वनी, पाणी इ. चाचण्यांच्या निकषांवर हा अहवाल आधारित आहे. विविध शासन संस्था, अशासकीय संस्था, वैज्ञानिक संस्था आदींकडून मिळालेले सहकार्य विविध संकेतस्थळांवर उपलब्ध असलेल्या माहितीच्या आधारे हा अहवाल तयार करण्यात आला आहे.
शहराचे हवामान, तापमान, पर्जन्यमान, मानव संसाधन, लोकसंख्या, दळणवळण याबाबत अहवालात माहिती दिली आहे.
हरीत क्षेत्रांची सद्यःस्थिती नमूद करण्यात आली आहे. हरीत क्षेत्रांच्या प्रमाणकांनुसार वृक्षलागवड आणि उद्याने विकसित करण्यात आली असून सन २०२०-२१ च्या तुलनेत सन २०२१-२२ मध्ये ३ टक्क्यांनी वाढ झाली आहे. शहरामध्ये आढळणाऱ्या विविध जैवविविधतेपैकी काही नोंदी या अहवालात दर्शविण्यात आल्या आहेत. जैवविविधतेचे संवर्धन, घनकचरा व्यवस्थापन, घनकचरा विल्हेवाट प्रकल्प, मोशी कचरा डेपोमध्ये आलेल्या घनकचऱ्याचा वार्षिक अहवाल, मटेरियल रिकव्हरी फॅसिलिटी, मेकॅनिकल कंपोस्टिंग प्रकल्प, वेस्ट टू एनर्जी प्रकल्प, प्लास्टिक कचऱ्यापासून पी. पी. पी. तत्त्वावर इंधननिर्मिती करणे, सेंद्रिय खतांची निर्मिती, बायोमायनिंग प्रकल्प, बांधकाम राडारोडा गोळा करून प्रक्रिया करण्याचा प्रकल्प आदींची माहिती या अहवालात देण्यात आली आहे.