पुणे शहर आणि परिसरात अनाधिकृत फ्लेक्स आणि होर्डिंगचा सुळसुळाट झाला आहे, त्यातूनच शहराचे विद्रुपीकरण होत असून नागरिकही त्रस्त झाले आहेत. त्याची गंभीर दखल घेऊन खुद्द न्यायालयानेही प्रशासनाचे कान टोचले आहेत. विशेष म्हणजे प्रशासन अद्यापही ताळयावर आलेले नाही, याउलट प्रशासनाने मात्रा म्हणून कागदी घोडे नाचविण्याचा ‘उतारा’ शोधला आहे. त्यामुळे अनाधिकृत फ्लेक्सचा ‘ बाजार’ आणखीनच वाढत चालला आहे.
शहरातील अनधिकृत जाहिरातींमुळे होत असलेल्या विद्रुपीकरणाबाबत उच्च न्यायालयात सुरू असलेल्या याचिकेच्या सुनावणीत न्यायालयाने महापालिकेस १९ नोव्हेंबरला याबाबत आदेश दिले आहेत. त्यापार्श्वभुमीवर महापालिकेने निवडणूक निकालानंतर शहरात कोणत्याही राजकीय पक्ष अथवा नागारिकांनी अनधिकृतपणे बोर्ड, फ्लेक्स, बॅनर्स तसेच कोणत्याही प्रकारच्या जाहीराती न लावण्याचे आवाहन केले होते. या आदेशाचे उल्लंघन केल्यास संबंधितांवर कडक कारवाई करण्याचा इशारा महापालिकेने दिला होता.
मात्र, एका बाजूला महापालिकेकडून हे आदेश काढण्यात आलेले असताना निवडणुक निकालानंतर काही तासांतच सार्वजनिक ठिकाणी फ्लेक्स तसेच राजकीय पक्षाच्या कार्यकर्त्यांचे आमदारांना शुभेच्छांसह भावी मंत्री म्हणून जागोजागी फ्लेक्स, बॅनर, जाहिरातफलक लागले आहेत. महापालिकेकडून त्यावर साधी कारवाई करण्याचीही तसदी घेतलेली नाही. त्यामुळे एका बाजूला न्यायालयाचे आदेशाची अंमलबजावणी करण्याचे आवाहन नागरिकांना केले जात असतानाच या आदेशाचे राजरोसपणे उल्लंघन होत असताना महापालिका प्रशासन मात्र बघ्याची भूमिका घेत आहे.
सारं काही आमदारांना खुष करण्यासाठीच…!
दरम्यान, आता महापालिका निवडणूक लागण्याची शक्यता वर्तविण्यात येत असल्याने निवडून आलेल्या आमदारांना खूश करण्यासाठी कार्यकर्त्याकडून चौकाचौकात फ्लेक्स लवण्यात आले आहेत. काही भागात फ्लेक्समुळे पदचार्‍यांना चालणे देखील कठीण झाले आहे. वाहनचालकांना वाहन चालवताना फ्लेक्स लक्ष वेधून घेत असल्याने रस्त्याचा अंदाज येत नाही. संपूर्ण पुणे शहरात हे चित्र असून त्यातून छोटे मोठे अपघात घडण्याचीही दाट शक्यता वर्तविण्यात येत आहे.
प्रशासन जोमात; कारवाई कोमात
निवडणूक निकालानंतर शहरात जागोजागी अनधिकृतपणे बोर्ड, फ्लेक्स, बॅनर्स लावून शहराचे विद्रुपीकरण केले जात आहे. माहापालिकेने इशारा देऊनही हे फ्लेक्स लागले. यावर मात्रा म्हणून केवळ कागदी घोडे नाचवण्याचे उद्योग महापालिकेने सुरू केले आहेत. महापालिका प्रशासनाने अनधिकृत फ्लेक लावणार्‍यांवर गुन्हे दाखल करण्याबाबत पोलीसांना कळविले आहे. एकही गुन्हा अद्याप दाखल झाला नाही. न्यायालयाने कान टोचल्यानंतरही महापालिका आणि पोलीस प्रशासनाला अद्याप जाग आली नसल्याचे समोर आले असून प्रशासन जोमात असून कारवाई कोमात गेली आहे.
महापालिकेच्या आकाशचिन्ह विभागाने युध्दपातळीवर कारवाई सुरु केली आहे. पालिकेच्या सर्व क्षेत्रीय कार्यालयाकडून बेकायदा फ्लेक्स लावणार्‍यांवर गुन्हा दाखल करण्याबाबतचे पत्र पोलिसांना दिले जात आहे. तसेच, सुमारे अडीच लाख रूपयांचा दंडाच्या नोटीसाही दिल्या गेल्या आहेत. लवकरच शहरातील सर्व अनधिकृत फ्लेक्स, बॅनर हटविले जातील, अशी माहिती पुणे महापालिकेच्या आकाशचिन्ह विभागाचे प्रमुख प्रशांत ठोंबरे यांनी दिली